"МЮ" бош мураббийи Дэвид Мойес ўз майдонида "Олимпиакос"ни мағлубиятга учратишга ва ЕЧЛнинг чорак финалига йўл олишига ишончи комил эканини таъкидлаб ўтди. Эслатиб ўтамиз, биринчи баҳсда Греция жамоаси 2:0 ҳисоби билан зафар қучганди.

"Футболчилар яхшироқ ўйнай олишлари мумкинлигини тушунишяпти. Шогирдларимга ишонаман, чунки кўриб турибман: улар бунга қодир, буни кўрсатиб бера олишларига эса умид қиламан. Тўғри, ҳозир "Юнайтед" бундай ўйинларни кўп ҳам намойиш қилавермаяпти, бироқ чоршанба куни албатта яна бир бор уриниб кўришимиз шарт.

Мавсумнинг бу қисмида ҳеч нарса биз кутгандек бўлмаяпти, лекин энг муҳими - "Олимпиакос"га қарши яхши ўйин ўтказиш ва кейинги босқичга чиқиш. Агар бунга эришсак, бу бизга жуда катта иштиёқ бахш этади. Тушунаман, 0:2 ҳисобидаги мағлубиятдан сўнг вазият жуда оғир, лекин биз ишонишда давом этамиз, ўзимизни кўрсатиш учун қўлимиздан келган барчасини қиламиз.

Чорак финалга чиқамиз деб ваъда бера олмайман, лекин сизни ишонтиришим мумкинки, биз устимиздаги футболка ҳурмати учун охиригача курашамиз! Ишончим комил, ўйиндан сўнг мухлисларимиз биз билан фахрланишади...", - деди шотландиялик мутахассис.