Осиё чемпионлар лигаси гуруҳ босқичининг 3-туридан ўрин олган «Бунёдкор» ҳамда «Фулад» жамоалари ўртасидаги ўйин якунланди. Учрашувда 1:1 ҳисобидаги дуранг натижа қайд этилди. Ўйиндан кейин ҳар икки жамоанинг мураббийлари иштирокида матбуот анжумани бўлиб ўтди.

Аввал Ҳусайн Фараки саволларга жавоб қайтарди.

– Бу ўйин биз учун қийин кечишини билган эдик. Рақиб жуда кучли эди. Бир очко ҳам биз учун ёмон бўлмади, лекин биз кўпроқ гол уришимиз ҳам мумкин эди. Биринчи бўлимда биз катта устунликка эга бўлдик.

– Жамоа бу ўйинда олдинги ўйинига қараганда кучсизроқ ўйин кўрсатди. Шунга нима дейсиз?

– Менимча, бугун ҳам ёмон ўйнамадик. Шунчаки имкониятлардан фойдалана олмадик. Бундан ташқари таркибда ҳам муаммоалар бор эди.

– Нима учун ўйин охирида рақибга устунликни бериб қўйдингиз?

– Буни нормал ҳолат деб ўйлайман. Бутун ўйин давомида устунликда ўйнаб бўлмайди. Таркибимизда ёш футболчилар кўп эди. Бундан ташқари рақиб охирги дақиқаларда босимни кучайтирди. Балки биз натижани сақлашга ҳаракат қилганимиз учун шундай бўлгандир.

– Гуруҳдаги иккинчи ўйиндан нима кутяпсиз?

– У ўйиндан бир нарса кутганим йўқ. Натижани тахмин қилолмайман. Менга қолса, «Ал Фатҳ» ғалаба қозонсин.

– «Фулад» уй жамоасими ёки меҳмон жамоаси?

– Уй ўйинларида мухлисларимиз бўлади. Меҳмонда эса бундай бўламайди. Бизни одатда 40 минг мухлис томоша қилади. Биз уйимизда ўйнашни яхши кўрамиз.