Кеча Жанубий Корея Кей-лигасида 4-тур ўйинлари бўлиб ўтди. Ушбу турда терма жамоамиз сардори Сервер Жепаров тўп сурадиган «Сеонгнам» ўз уйида «Сувон»ни қабул қилди.

Ўтган турларда бош мураббийнинг ғазабига дучор бўлиб, ҳаттоки ўйин қайдномаларига ҳам киритилмаган ҳамюртимиз бу сафар захира ўриндиғидан жой олди. Чемпионатни анча бўш бошлаган сеонгнамликлар ушбу ўйинни қандай қилиб бўлмасин ўз фойдаларига хал қилишга уринишди. Ўйиннинг 21-дақиқасида бразилиялик Валдивия ва 36-дақиқасида Ким Чеол Хо киритган голлар «Сеонгнам»га мавсумдаги дастлабки ғалабани келтирди. Ўйиннинг 72-дақиқасида эса Сервер Жепаров Валдивиянинг ўрнига майдонга тушди ва ўйин охирига қадар ҳаракатланди.

Ўйиндан кейинги матбуот анжуманида бош мураббий Парк Жонг Хван:
"Негалигини билмадиму ўйиндан олдин ютишимизни кўнглим сезди. Ўйинга бор кучини бериб ҳаракат қилган шогирдларимга ташаккур. Ўйиндан олдин футболчиларимизни ҳам руҳий, ҳам жисмоний тайёрлай олганимдан хурсандман. Уларга: "агар бугун ғалаба қозона олмасак, стадионга келаётган мухлисларимиз кун сайин камайиб бориши"ни айтгандим. Улар ишончимни оқлашди. Ҳали камчиликларимиз етарлича. Буни эса секин-аста тузатиб борамиз", - деди.

Журналистларнинг Сервер Жепаров майдонга туширилиши ҳақидаги саволига эса мураббий:

"Валдивия кичик жарохат олиб, югуришидаги нуқсонларни илғадим ва алмаштиришга қарор қилдим. Лекин Жепаров ўз вазифасини бажара олмади. Мен бировни ёмон кўрганимдан эмас, жамоага фойдаси тегадиган футболчини ўйнатишни истайман. Агар Валдивия жароҳат олмаганида уни алмаштирмаган бўлардим", - дея жавоб берди.

Отабeк Йўлдошeв
Жанубий Корeя, Сeул