“Насаф”  –  “Бухоро” баҳсидан сўнг дастлаб мезбонлар бош мураббийи Рўзиқул Бердиев учрашув ҳақидаги фикрлари билан ўртоқлашди:

— Аввало, жамоамизнинг барча мухлисларини бугунги ғалаба билан табриклайман. Мени хурсанд қиладиган томони - йигитларимизнинг ўйини тобора очилиб бормоқда. Бугунгидан ҳам яхшироқ ўйин кўрсатишимиз мумкин эди. Бироқ рақиб ҳам ҳимояда яхши ўйнади. Бугунги ғалаба футболчиларимизнинг истак ва маҳоратлари самараси деб ҳисоблайман.

— Фаррух Сайфиев кўп хато қилмоқда. Ўзига бўлган ишонч йўқолиб бораётгандек?
— Сайфиев тўпсиз ҳаракат қилишни яхши уддалайди. Унинг барқарор ўйнолмаслиги ёшлиги билан боғлиқ. Ишонаманки, унинг жамоага ҳали жуда катта ёрдами тегади.

— Элдорбек Суюнов “Насаф” ҳужум қилаётган вақтда дарвозани ташлаб чиқиб кетмоқда. Бу эса мухлисларни хавотирга солмоқда.
— Алоҳида дарвозабонлар мураббийи бизда иш олиб боради. У билан маслаҳатлашган ҳолда Элдорга бу қалтис ҳолатлигини тушунтирамиз. Ўзим ҳам бир вазиятда унинг дарвоза марказигача келишидан хавотирга тушдим.

— Ҳамза Каримовнинг майдонга тушмаслиги “Локомотив”га қарши ўйиндаги хатосига боғлиқми?
— Асло. Биригина хато учун уни таркибга қўшмаслик мантиқсизлик бўлади. Ҳамма ҳам хато қилади. Биз шунчаки ёшларга имкон бердик. Кейинги учрашувларда Каримовни асосийда кўрасизлар.

— Нима сабабдан уй учрашувлар ТВда намойиш этилмаяпти?
(Бу саволга матбуот котиби Азиз Нурий жавоб берди)
— Бугундан бошлаб Қашқадарё ТВдан барча уй учрашувлар олиб кўрсатилади. Спорт-ТВдан ҳам учрашувларимиз олиб кўрсатилишини таъминлашга ҳаракат қиламиз.

Олим Толипов ёзиб олди