Агар Қатар 2022 йилги футбол бўйича жаҳон чемпионати баҳслари мезбонлигини коррупция йўли билан қўлга киритгани тасдиқланса, Япония ушбу мундиалга мезбонлик қилишга тайёр. Бу ҳақда, Япония футбол уюшмаси (ЯФУ) президенти Куния Даинига асосланиб, Agence France-Presse хабар бермоқда.
«Агар ФИФА Қатардаги мусобақа мезбонлигига бошқа бир муқобил мамлакатни қидирадиган бўлса, бизда унинг талабларига жавоб берадиган стадионлар бор. Қўшимчасига, 2020 йили Олимпиада ўйинларини қабул қиламиз ва бу ҳам бизнинг имкониятларимизни оширади», – деди Даини.
Ҳозирги вақтда ФИФАнинг этика қўмитаси америкалик собиқ прокурор Майкл Гарсия раҳбарлигида Қатар ЖЧ-2022 мезбонлигини қандай қўлга киритгани юзасидан текширув ишларини олиб бормоқда. Кўпчилик, айниқса, АҚШ тарафдорлари Қатар давлати мезбонликни тўғри йўл билан қўлга киритганига шубҳа билдирмоқда. Қайд этиш жоиз, ушбу мусобақа мезбонлиги учун курашда Қатар, АҚШдан ташқари, Японияни ҳам мағлуб этганди.
Бундан ташқари, Қатардаги ЖЧ-2022га тайёргарлик, хусусан, мундиалга мўлжалланган объектлардаги меҳнат муҳожирларининг ўлими ҳолатлари халқаро ҳамжамият томонидан танқид остига олинмоқда – маълумотларга кўра, сўнгги 20 ой давомида Қатардаги ЖЧ-2022 объектлари қурилишида камида 450 нафар ҳиндистонлик ишчи ҳалок бўлган.
Бундан ташқари, AFP’нинг қайд этишича, Қатардаги ҳавонинг ҳаддан ташқари иссиқлиги ҳам ушбу мамлакат мезбонлигини сақлаб қолишига халал бериши мумкин. Айни вақтда, агентликнинг таъкидлашича, Япониянинг иқлими ҳам мақбул, шунингдек, бундай катта мусобақаларга мезбонлик қилиш тажрибасига ҳам эга.
