Бугун бўлиб ўтган "Машъал" - "Пахтакор" (0:1) учрашувидан сўнг  мезбонлар бош мураббийи Александр Хомяков матбуот анжуманида иштирок этди.

"Ғалабани жуда-жуда истаган эдим. Айниқса, икки турдан буён ўз майдонимизда ғалаба қозонмаганимиз учун бу истак жуда кучли эди. Буни футболчиларга ҳам тўла тушунтурдим. Ғалаба қозониш учун бармоғимдан кечишга ҳам тайёр бўлардим. "Пахтакор" биздан кучли ўйнади ва ғалабага эришди. Майдонда учта ҳужумчи билан ўйнасак ҳам самара бермаётгани ташвишлантирмоқда. Гол урмадик ва шу боис мағлуб бўлдик.

"Пахтакор"да алоҳида маҳоратга эга бўлган футболчилар жуда кўп. Битта қулай имконият ва битта гол. Футбол қоидаси ҳам шундай. Жамшид Искандеровнинг зарбалари ҳақида билардим ва охир оқибат уни ушлаб қола олмадик.

Ҳозиргача тўртта ўйин ўтказган бўлсак ҳеч бирини майдони ажойиб эди дея олмайман. Тўғри қиш давомида сунъий майдонда учрашувлар ўтказдик, лекин бугун икки жамоа ҳам бир хил майдонга тушди. Ҳеч бир футболчини ажратиб кўрсата олмайман ва эътироз билдирмайман".