19 апрель, шанба куни Тошкентдаги "Ўзбекистон" спорт мажмуасида футзал бўйича Ўзбекистон ва Эрон терма жамоалари ўзаро ўртоқлик учрашувини ўтказишди.

Футзал бўйича Осиё Чемпионатига тайёргарлик кўраётган Ўзбекистон терма жамоаси Тошкентда Эрон терма жамоасига қарши иккита ўртоқлик учрашувини ўтказиши ҳақида аввалроқ хабар берган эдик. Бугун иккала терма жамоа пойтахтдаги «Ўзбекистон» спорт мажмуасида ўзаро илк учрашувда майдонга тушишди.

Баҳодир Аҳмедов бошчилигидаги Ўзбекистон терма жамоаси илк ўйинда қитъанинг энг кучли терма жамоаларидан бири, кўп карра Осиё чемпиони - Эрон терма жамоасига 1:6 ҳисобида мағлубиятга учради. Ўзбекистон терма жамоаси сафидаги ягона голга Фарҳод Абдумавлонов муаллифлик қилди.

Мазкур терма жамоалар ўртасидаги иккинчи ўйин, 20 апрель, якшанба куни бўлиб ўтади. Ўйин «Ўзбекистон» спорт мажмуасида соат 12:00да бошланади.

Футзал. Ўртоқлик учрашуви.
Тошкент. «Ўзбекистон» спорт мажмуаси.
Ўзбекистон - Эрон 1:6
Голлар: Фарҳод Абдумавлонов 39 - Муҳаммад Шажари 16, Фарҳод Фахим 18, Мехсам Хаям 24, Алиризо Вафоий 36, Вохид Шафиеи 25, 36,