Cергей Лушан бош мураббийлигидаги Ўзбекистон U-19 ёшлар терма жамоаси 22 апрель куни ЖАР стадионида «Бунёдкор» клуби ёшларига қарши назорат ўйинини ўтказди.

1995 ва ундан кейинги йилларда туғилган футболчилардан иборат Ўзбекистон U-19 ёшлар терма жамоаси 20 апрель куни Тошкентда ўзининг навбатдаги ўқув-машғулот йиғинини бошлагани ҳақида хабар берган эдик.

Сергей Лушан бошқарувидаги Ўзбекистон U-19 ёшлар терма жамоаси 30 апрель кунига қадар давом этадиган йиғин давомида, учта назорат учрашувида майдонга тушиши режалаштирилган. Кеча, Ўзбекистон ёшлар терма жамоаси йиғин давомидаги ўзининг илк назорат ўйинида, Тошкентнинг «Бунёдкор» клуби ёшларига қарши майдонга тушди ва йирик – 4:1 ҳисобида ғалаба қозонди.

ЖАР стадионида бўлиб ўтган учрашувнинг илк бўлимини 4:0 ҳисобида ўз фойдасига ҳал қилган ёшлар терма жамоаси, иккинчи бўлимда бутунлай янгича таркиб билан ўйнади. Якунда «Бунёдкор» ёшлари битта жавоб тўпини киритишди ва ўйин 4:1 ҳисобида Сергей Лушан жамоаси ғалабаси билан якунланди.

Эслатиб ўтамиз, Ўзбекистон ёшлар терма жамоаси (U-19) шу йилнинг октябрь ойида Мьянма давлатида бўлиб ўтадиган ёшлар ўртасидаги (U-19) Осиё чемпионати финал босқичида иштирок этади.

Назорат учрашуви.
22 апрель, Тошкент, ЖАР стадиони.
Ўзбекистон U-19 - "Бунёдкор" (ёшлар) 4:1
Голлар: Шомуродов 2та, Илёсов, Сидиров - Рихсибоев.