Олий лига 6-туридан ўрин олган "Навбаҳор"-"Сўғдиёна" учрашувидан сўнг (4:2) меҳмонлар устози Даврон Файзиев журналистларнинг саволларига жавоб берди.

Даврон Файзиев, «Сўғдиёна» жамоаси бош мураббийи: "Бугун охирги марта матбуот анжуманига киришим бўлса керак. Чунки ҳар бир мураббийда ҳам чек-чегараси бўлади. Яқин кунлар ичида бир қарорга келишга аҳд қилдим. Қандай қарорга келишим эса сўзларимнинг ўзидан маълум. Натижа ижобий кўриниш олмаяптими, демак бу ерда мураббий айбдор. Қолганини муҳокама қилишга хожат бўлмаса керак. Балки жамоага янги мураббий келар.

Ўйин тўғрисида гапирадиган бўлсам, дарвозамизга белгиланган пенальти жамоамизни руҳий томондан синдириб қўйди деб ўйлайман. Олдинги учрашувларда ҳам биринчи ўтказиб юборилган голдан кейин ана шундай руҳий тушкунлик юзага келмоқда. Жамоа ўз муаммоларини қанчалик тезкорлик билан бартараф этишни уддасидан чиқса, ижобий натижалар бўлади.

Ўйин қизиқарли тарзда ўтди. Ҳисобни икки марта қисқартирган бўлсада, ўз дарвозамиздан тўп ўтказиб юбордик. Назаримда бугун икки тенг кучли жамоа майдонда куч синашди. «Навбаҳор»да ҳам муаммолар борлигини билардик. Лекин, биздаги муаммолар наманганликларникидан ҳам аянчли аҳволда. Ўйиндаги ғалаба билан «Навбаҳор» футболчиларини табриклайман".