Олий лига 6-туридан ўрин олган "Навбаҳор"-"Сўғдиёна" учрашувидан сўнг (4:2) мезбонлар устози Бахтиёр Ашупматов журналистларнинг саволларига жавоб берди.

Бахтиёр Ашурматов, «Навбаҳор» жамоаси бош мураббийи: «Ўйинни қийин кечиши олдиндан маълум эди. Бир сўз билан айтганда «Сўғдиёна» ёмон таассурот қолдирмади. Биринчи бўлимда меҳмонлар устунликка эришишди. Жиззахликларда юзага келган вазиятдан хабаримиз бор эди. Мамлакатимизнинг малакали мураббийларидан бири Даврон Файзиев қийин шароитда ҳам яхшигина жамоани шакллантиришга эришганлигини амалда исботламоқда.Фақатгина муаммолар ижобий натижаларни қўлга киритилишига имкон бермаяпти деб ўйлайман.

Саидовни ҳужумчилар сонини ошириш мақсадида алмаштирдик. Икки нафар ҳужумчи билан ўйнашни мақсад қилганимиз учун Мансурни ўрнига бошқа футболчини майдонга туширдик. Назаримда мухлислар чиройли ўйинга гувоҳ бўлишди.

Шу ўринда мухлисларимиздан жамоа номидан бир илтимосим бор. Ҳар доим ҳам футболда ҳужумкор ўйин кўрсатиб бўлмайди. Ўйин қовушмаган пайтда мухлисларимиз жамоани қизғин тарзда қўллаб туришса, футболчилар руҳан ўзларини яхши ҳис қилган ҳолда ҳаракат қилишади. Ғалаба билан ишқибозларимизни табриклайман».