Воҳамиздаги ёш истеъдодли футболчилар фаолияти ёритилиб бориладиган янги «Истеъдодларни излаймиз» лойиҳасининг бугунги қаҳрамони Аслиддин Абдиев.
Инсон ҳаётда ҳамиша юксак чўққиларни кўзлаб яшайди. Ўз орзусига эришишини истайди.Табиат эса ҳар кимга ўз улушини ато этади. Болалик орзуларини амалга оширишнинг ўзи булмайди.
Бу йўлда қанчадан-қанча тўсиқларни енгиб ўтишга тўғри келади. Ўша самимий туйғулар қоронғу кунларингда маёқ бўлиб йўлингни ёритади, хурсанд чоғларингда эса ўз оғушига олиб порлоқ келажак сари чорлайверади.
Рукнимизни илк қаҳрамони Аслиддин Абдиев. 1995 йил 14 май куни Қамаши туманида таваллуд топди. Аслидддиннинг футболга қизиқишига акаси Ҳусниддин Абдиевнинг ўрни беқиёсдир.
Эндигина 19 ёшга қадам қўяётган Аслиддинни гўдаклигиданоқ футбол оламининг сеҳрли мўъжизалари ўзига ром этди. У ўз олдига Одил Аҳмедов, Виталий Денисов, Миржалол Қосимовлар каби довруғ қозонишни қатъий мақсад қилиб қўйди.
Ҳа, мурғак қалбдан жой олган орзуларнинг куч-қудрати нималарга қодир эмас дейсиз?!
Аслиддинни футболга етаклаган сабаблардан бири қизиқишлари бўлса, иккинчи томондан отаси Бахтиёр Жўраевдир. Бундан саккиз йил муқаддам ўғлида футболга нисбатан иштиёқ борлигини сезган Бахтиёр ака Аслиддинни қўлидан етаклаганча Муборак шаҳридаги “Машъал” футбол академияси мураббийси Дилшод Андаевга олиб келди. Аслиддин меҳрибон ва талабчан устози қўлида футбол сирларини астойдил ўрганишга киришди. Футболга бўлган қизиқиш тўпни бир зум ҳам оёғидан қўймасликка, Дилшод аканинг кўрсатмаларини оғишмай бажаришга ундади.
Ўзбекистон футболида яна бир ажойиб истеъдодли футболчи етишиб чиқмоқда. Биз аминмизки, яқин 4-5 йил оралиғида миллий футболимиз ўз юлдузини қучоқ очиб қарши олади. Бўладиган бола бошидан белгили дейдилар. Аслиддин ҳозирданоқ ўйинларида ўзини кўрсаётганлиги, ниҳоятда тиришқоқлиги ва ҳаракатчанлигини кузатиб ана шу фикрга келдик.
-Сени келажакда футболдаги ҳаётингда нималар кутаётганлигини тасаввур эта оласанми? -дейман унга.
- Аввало ҳар ким ўз келажагини ўзи яратади, -дейди Аслиддин. Ҳаётимнинг мазмуни футболда эканлигини ҳозирданоқ ҳис қиламан. Мени келажакда катта футбол кутаяпти, десам балки мақтаниш бўлар. Қисқаси, мен катта футболга чиқиш учун астойдил ҳаракат қилаяпман.
-Вақти келиб машҳур футболчи бўлишингга ишонаман. Катта футбол бўсағасида илк интервъюнгда юракдан айтадиган қандай гапларинг бор?
-Мени кутинг, мен албатта сиз билан катта учрашувларда учрашаман.
Аслиддин Абдиев
12 ёшида футболга кириб келади
Биринчи муррабийи: Ҳусниддин Абдиев (акаси)
“Машъал”футбол мактабида мураббийи: Дилшод Андаев
Фаолияти: 2011 йил Машъал 1 лига
2014 йил Машъал ўринбосарлари
2013 -2014 Ўзбекистон ўсмирлар термаси аъзоси (U-19)
Ампуласи: Ҳужумчи
Энг ёқтирган футболчиси: Одил Ахмедов, Криштианy Роналду
Севимли жамоаси: “Машъал” “Манчестер Юнайтедъ”
Севимли таоми: Ўзбек палови
Орзуси: Ўзбекистон миллий терма жамоасида тўп сўриш
Фахриддин ЧОРИЕВ тайёрлади
