30 апрель куни Вьетнамда старт оладиган футзал бўйича Осиё Чемпионатида иштирок этадиган Ўзбекистон терма жамоаси аъзолари Вьетнамнинг Хошимин шаҳрига етиб боришди.

Таъкидлаш жоиз, Баҳодир Аҳмедов бош мураббийлигадаги Ўзбекистон терма жамоаси Вьетнамдаги Осиё Чемпионати стартигача Хитойда машғулот олиб борди ва Хитой футзал терма жамоасига қарши иккита ўртоқлик учрашувида майдонга тушди.

Дастлаб, 25 апрель куни ўтказилган илк ўйинда 1:1 ҳисоби қайд этилган бўлса, орадан икки кун ўтиб терма жамоалар иккинчи маротаба ўзаро куч синашдилар ва бу учрашувда Дилшод Раҳматовнинг ягона голи Ўзбекистон терма жамоасига ғалаба келтирди – 1:0.

Эслатиб ўтамиз, Баҳодир Аҳмедов бош мураббийлигидаги Ўзбекистон терма 30 апрель куни Осиё Чемпионати «D» гуруҳида Япония, Қирғизистон ва Жанубий Корея терма жамоаларига қарши тўп суради. Баҳодир Аҳмедов шогирдлари ОЧдаги илк ўйинини 1 май куни Қирғизистон терма жамоасига қарши ўтказади. 30 апрель куни эса, «D» гуруҳидан ўрин олган терма жамоалар бош мураббийлари иштирокида матбуот анжумани бўлиб ўтади.

Футзал. Осиё Чемпионати.
30 апрель – 10 май. Вьетнам.

«D» гуруҳи.
1-тур, 1 май.
Ўзбекистон – Қирғизистон (16:30)
Жанубий Корея – Япония

2-тур, 3 май
Япония – Ўзбекистон (16:30)
Қирғизистон – Жанубий Корея

3-тур, 5 май
Ўзбекистон – Жанубий Корея (16:30)
Япония – Қирғизистон

*Ўйинларнинг бошланиш вақти Тошкент вақти билан кўрсатилган.