Кеча истеъфога чиққан “Нефтчи” футбол клуби раиси Комил Мирзабоев жамоада бир йил ҳам ишлагани йўқ.
Клубда ўтган йили амалга оширилган “тўнтарилишдан” сўнг Комил Мирзабоев раҳбар сифатида иш бошлаганди. Аммо ўтган маълум муддат оралиғида бу инсон номига илиқ фикрлар билдирилмади. Бундан бир ойлар муқаддам журналист Фарҳод Норбўтаев томонидан ёзилган мақола қайсидир маънода барчасига нуқта қўйди. Яъни, айнан шу мақола чоп этилганидан сўнг раиснинг курсиси қимирлаб қолди. Бизга маълум бўлишича, шу мақоладан кейин клубда текширувлар ўтказилган. Лекин ҳеч бир расмий манбада бу ҳақида маълумот берилмади.
Текширув давомида мақолада келтирилган фактлар қанчалик асосли ёки асосли эмаслиги назоратдан ўтказилган. Натижа қандай бўлганлигини билмадикку, ҳар ҳолда Комил Мирзабоев истеъфога чиқарилди. Бу бекордан бекор бўлмаса керак. Қолаверса, бугун мураббийлар штабидаги инсонларнинг айримлари ҳам ишдан бўшатилди. Бундан кўринадики, журналист ёзган мақолада қисман бўлса-да, жон бор.
Тўғри, мақола сайтларда чоп этилгач, Комил Мирзабоев водийлик журналистлар учун матбуот анжумани ташкил қилди ва шахсан мақола муаллифи олдида ўзини оқлади. Аслида ўзини оқлаши қийин эмасди. Сабаби, Фарҳод Норбўтаев ёзган мақоласида аниқ бир факт келтирмаган, шунчаки, миш-мишларга таянганди. Шунинг учун ҳам матбуот анжуманида фактларни исботлай олмаганди. Бизнинг футболда шундай: клубда ишлаётган расмийлар шундай йўл тутишадики, қоғозда ҳаммасини қонуний қилиб қўйишади. Шу боис, уларни давлат ташкилотлари текширувдан ўтказмаса, бошқа инсонлар айбини исботлай олмайди. Ҳақиқат шуки, футолимиздаги миш-мишларнинг деярли 80-90 фоизида жон бор. Хусусан, ўша Фарҳод Норбўтаевнинг мақоласидаги фактларда ҳам.
Айтганимиздек, матбуот анжуманида ўзининг айбсизлигини таъкидлаган Комил Мирзабоев ишдан бўшади. Мирзабоев ўз аризасига кўра, ишдан бўшади дейдиган бўлсак, ҳар қандай ташкилотда истеъфога чиқадиган ходим ўз аризасига кўра ишдан кетади. Оддий мисол, биз журналистлар ҳам. Агар ташкилот томонидан ишдан бўшатиладиган бўлса, компенсация тўланиши керак. Бизда ҳали бу оммалашмаган. Айтмоқчи бўлганимиз бу бироз ишонарсиз. Дарвоқе, “Нефтчи” учун беш йиллик дастур ишлаб чиққан Мирзабоев ўз-ўзидан хоҳишига кўра, ишдан кетмаган бўлса керак? Демак, мақола жамоанинг ички муҳитида таъсир қилган. Боз устига, давлат ташкилотлари томонидан текширувлар олиб борилган. Айнан Комил аканинг ўзи матбуот анжуманида ҳуқуқ-тартибот органлари ҳақида сўз юритганди. Мана самараси.
Хўп, Мирзабоевнинг ишдан кетишига текширувлар ҳам сабаб бўлмаган десак, унда нима? Клубнинг ривожланиши учун беш йиллик дастур ишлаб чиққан инсон ҳали ишининг чорагини ҳам бажармасдан ўз хоҳиши билан истеъфога чиқадими? Ишониш қийин. Асосийси, ҳукуматимиз шундоқ дастур ишлаб чиққан ҳалол инсонни индамай ишдан бўшаб кетишига қараб турадими? Аксинча, маошини кўтариб бўлса-да, жамоада олиб қолади. Нега Самвел Бабаян шунча танқид қилинганида ҳам клубдаги ишини давом эттириб келаверади. Унда ҳам худди Мирзабоевда бўлгани сингари аниқ бир дастур бор, ахир?! Хуллас, Мирзабоевни айбдор десак, қўлимизда расмий расмий айблов йўқ, айбсиз дейдиган бўлсак, “Нефтчи”нинг натижалари бундай эмаслигини кўрсатиб турибди.
Фурқат Нишонов
