Сайтимизнинг бир қатор мухлислари бизга яхши таклиф билан чиқишди. Тўрт нафар ишқибозларимиз бирлашган блог юритишга қарор қилишди ва биз уларнинг таклифини қабул қилдик. Сиз уларни яхши танишингиз керак: FCYUVENTUS, BAURYZHAN, KASPERISKIY, SHAVKATFCB. Блог очишдан асосий мақсад нима эканлиги ҳақида уларнинг ўзидан эшитамиз ва дастлабки мақолани эътиборингизга ҳавола қиламиз.
Ҳурматли stadion.uz сайти ўқувчилари ва юзерлари!
Ушбу блогни йўлга қўйишимиздан мақсад, сайт юзерлари фикрларини эътиборга олган ҳолда, уларнинг фикр-мулоҳазаларингизни ўрганиб, уларни саралаб, бирлаштириб, улардан оқилона фойдаланиш, футболимиз мутахасис ва мутасаддиларга етказиш. Энг олий мақсад эса футболимиз равнақи йўлида фойдаланишдан иборат.
Блогимиз оркали миллий футболимиздаги долзарб муаммоларни ёритиш, уларни таҳлил қилиш ва уларни бартараф қилиш йўлида таклифлар киритиш кўзда тутилган. Шунингдек, блогимизда Жаҳон футболидаги ўзгаришларни кузатиб боришингиз, таҳлилий мақолалар, мозий юлдузлари ҳақида ҳам маълумотлар, собиқ футболчиларимизнинг фаолияти, терма жамоамизнинг ўтмишдаги ёрқин ўйинлари хақидаги маълумотлар, ҳозирги вақтдаги муаммолар хақида таҳлилий, танқидий мақолалар, талаб ва таклифлар ўрин олади.
Бизнинг бу блогни юритишдан мақсад юртимизда миллионлар ўйинига озгина бўлса ўз ҳиссамизни қўшиш, муаммоларни имкон қадар ёритиш ва сиз каби фидойи юзерларимиз ўз фикрларини билдиришлари учун минбар бўлиб хизмат қилишдан иборат.
Албатта ҳар бир иш, ҳар бир лойиҳа камчиликлар, тўлдиришларсиз бўлмайди. Бизнинг камчиликларимизни бартараф қилишда сизларнинг фикр-мулоҳазаларингиз муҳим ўрин тутади. Ўйлаймизки, бизнинг бу фикр-мулоҳазаларимиз, таклифларимиз, оз бўлса-да ўзбек футболига фойдаси тегади. Мақсадимиз футболимиздаги камчилик ва ютуқларни холисона ёритиш. Келинглар, футболимиз ривожи учун биз ҳам енг шимариб ишга киришайлик. Аминманки, бизнинг бу ҳаракатларимиз албатта ўз самарасини беради. Шундай экан, бирдамликда барчамиз яхши ниятлар ила футболимиз истиқболи учун ҳамжиҳатликда ҳаракат қилайлик.
Камолиддин (KASPERISKIY)
Stadion.uz юзерларига атаб
Барчангиз ҳам элимизнинг дилбандисиз,
Шу муқаддас она-замин фарзандисиз,
Футболимиз риштасининг бир бандисиз,
Дўстларимсиз, стадион юзерлари...
Адоғи йўқ ғалабалар ҳамрози сиз,
Мухлислар муродини сиймоси сиз,
Футбол деган атаманинг имлоси сиз,
Дўстларимсиз, стадион юзерлари...
Қувонаман сафингизда борлигимдан,
Сизни чексиз дўстлигизга ёрлигимдан,
Дўст-қудалар, оға-иним маслакдошим,
Дўстларимсиз, стадион юзерлари...
Бурхонбегу Абдуазиз Бауыржон ё,
Камолиддин, Жамшид ака Мансурбек ё,
Мағлуб кунда ёритгувчи нурлар гўё,
Дўстларимсиз, стадион юзерлари...
Нур ёғилган комментлардан мадад олдим,
Дўстларимни камтарона шеърга солдим,
Узр энди бир оз шоир бўлиб қолдим,
Овозимсиз, стадион юзерлари...
Шавкатбек Неъматов (SHAVKATFCB)
Ушбу блогнинг “Техника жойида, жисмоний ҳолат-чи?” деб номланган дастлабки мақоласини мутолаа қилишингиз мумкин.
