Ўзбекистон XXIII миллий чемпионати биринчи давра ўйинларининг ярми ортда қолди.

Ҳакамлар фаолияти анъанавий равишда энг кўп муҳокама қилинадиган мавзулардан бири ҳисобланади. Арбитрларнинг фаолиятига клублар, матбуот, мухлислар муносабат билдиради.

Олий Лига жамоалари ўртасидаги мусобақанинг қайд этилган қисми давомидаги ҳакамликни таҳлил қилиб, ҳакамлар учрашувларни муносиб даражада бошқариб бораётганликларини ишонч билан таъкидлаш мумкин. Ўтган 49 учрашув давомида назоратчилар томонидан бош ҳакамдан тортиб захира ҳакамларигача ҳеч кимга бирорта ҳам паст баҳо қўйилгани йўқ.

Жорий Чемпионатда медаллар учун даъвогар ҳисобланган «Пахтакор» ва «Локомотив» жамоалари ўртасидаги Олий Лига 7-тур марказий учрашувидаги ФИФА рефериси Валентин Коваленконинг, беллашувнинг кескин ва шиддатли руҳига қарамай, эътирозга сабаб бўлмаган ҳаракатлари – малакали ҳакамлик фаолияти намуналаридан бири бўлди.

Ўзбекистон Футбол Федерацияси, Ўзбекистон Профессионал Футбол Лигаси «Пахтакор» – «Локомотив» учрашувидаги сифатли ҳакамлик ишини муносиб баҳолади. Бош ҳакамга 1 миллион сўм миқдорида бонус билан тақдирлаш ҳақида қарор қабул қилинди.