6 июнь куни олий лиганинг 11-турида "Пахтакор" "Металлург"ни қабул қилади.
"Металлург" Рустам Мирсодиқов бошчилигида бу мавсумни муваффақиятли бошлай олмаганди. Дастлабки 4 ўйиндаги мағлубиятдан кейин бекободликлар ўзларига келишди ва навбатдаги 6 ўйинда 13 очко тўплашди. Турнир жадвалида эса 6-ўринга кўтарилишди. Аста-секинлик билан таркибни ёшартириб бораётган Мирсодиқов ўйин савиясини аввалгидек сақлаб қолишни уддаламоқда.
Жамоалар сафида ўйинни дисквалификация туфайли ўтказиб юборадиган ўйинчилар йўқ.
Олий лига ўйинларида 32 учрашув ўтказилган. Уларнинг 25тасида "Пахтакор", 3тасида "Металлург" зафар қучган. Яна 4 беллашув дуранг натижа билан якунланган. Жамоамиз 87 бор, бекободликлар 22 марта тўп киритган. Тошкентда ўтган 17 баҳснинг 15тасида "шерлар" устун келган, яна 2 ўйинда дуранг қайд этилган. Охирги бор рақиб 2011 йил "Пахтакор" стадионидан очко билан қайтган. Ўшанда 0:0 ҳисоби кузатилган. Ўтган йилги беллашувларда жамоалар ўз майдонида ғолиб бўлишган. Бекободда 2:0, Тошкентда 5:2 ҳисобларида мезбонлар муваффақиятга эришган.
"Пахтакор" - "Металлург" баҳсига ташриф буюриб, "Соғлом бола йили"га бағишланган "Омадли мухлис" ижтимоий акциясида иштирок этиш ва асосий эсдалик совға сифатида "Матиз" автомобилини ютиб олиш имкониятига эга бўласиз. Шунингдек, бошқа эсдалик совғалари ютуқ сифатида топширилади. Чипталарни харид қилиш билан "Омадли мухлис" ижтимоий акцияси иштирокчисига айланасиз. Чипталарни "Пахтакор" Марказий стадиони кассаларидан харид қиласиз. Чипта нархи 5000 сўм.
"Пахтакор" - "Металлург" учрашуви 6 июнь, жума куни "Пахтакор" Марказий стадионида соат 19:30да бошланади. Мухлисларни стадионга чорлаб қоламиз. "Пахтакор"ни қўллаб-қувватланг ва совғалар ютиб олинг!
«ПАХТАКОР» - «МЕТАЛЛУРГ»
Ҳакамлар: Олим Толибжонов (Тошкент), Жаҳонгир Саидов (Тошкент), Баҳром Норсафаров (Қарши), Аброр Жўрахонов (Андижон).
Назоратчи: Ғайрат Каримов (Тошкент).
ЎзПФЛ вакили: Григорий Ртвеладзе.
