Темур Олимхўжаев бош мураббийлигидаги Ўзбекистон U-16 ўсмирлар терма жамоаси «Каспий Кубоги» турниридаги сўнгги ўйинида Қирғизистон ўсмирлар терма жамоасига 0:1 ҳисобида имкониятни бой берди.

Дастлаб, 31 май куни Қозоғистон ўсмирлар терма жамоасини йирик ҳисобда мағлубиятга учратиб, турнирни ғалаба билан бошлаган Темур Олимхўжаев шогирдлари 2-тур ўйинида 1 май куни Туркия U-17 ўсмирларига қарши 2-тур ўйинида 0:2 ҳисобида мағлубиятга учради.

Шу тариқа гуруҳ босқичида 2-ўринни эгаллаган Темур Олимхўжаев шогирдлари 2-май куни 5-8 ўринлар учун баҳсда Япония ўсмирлар терма жамоасига қарши майдонга тушдилар ва асосий вақти 2:2 ҳисоби билан якунига етган ўйинда пенальтилар сериясида мағлубиятга учрашди. Ўзбекистон U-16 ўсмирлар терма жамоаси турнирнинг сўнгги ўйинида 4 июнь куни 8-ўрин учун баҳсда Қирғизистон U-17 ўсмирлар терма жамоасига қарши ўйнаб, 0:1 ҳисобида мағлуб бўлди ва турнирдаги иштирокини якунлади.

Мусобақада жами 12 терма жамоа иштирок этиб, уларнинг аксариятини 17 ёшгача бўлган ўсмирлар терма жамоалари ташкил этди. Фақат Ўзбекистон ва Озарбайжон терма жамоалари мусобақада 16 ёшгача бўлган ўсмирлар термаси билан мазкур мусобақада иштирок этишди.

Эслатиб ўтамиз, «Каспий Кубоги» Ўзбекистон U-16 ўсмирлар терма жамоасининг сентябрь ойида Таиландда ташкил этилиши кутилаётган Осиё чемпионатига тайёргарлигининг бир қисмидир. Ўзбекистон ўсмирлар терма жамоаси ушбу мусобақа финал босқичи «С» гуруҳида Кувайт, Непал ва КХДР ўсмирларига қарши тўп суради.

Ўзбекистон U-16 ўсмирлар терма жамоасининг «Каспий Кубоги»даги барча ўйинлари:
Гуруҳ босқичи.
30 май. Ўзбекистон – Қозоғистон 8:1
1 июнь. Туркия – Ўзбекистон 2:0

5-8 ўринлар учун баҳслар.
2 июнь. Ўзбекистон – Япония 2:2 (пенальтилар сериясида 3:5)
4 июнь. Ўзбекистон – Қирғизистон 0:1