Ассалому алайкум, азиз дўстлар
Stadion.Uz сайтдаги блоглар қаторига бугундан эътиборан “Forza Inter” блоги ҳам қўшилди. Ушбу блог орқали Миланнинг “Интернационале” клуби ҳақида таҳлилий-субъектив мақолаларни мунтазам бериб боришга ҳаракат қиламан. Ҳа, мақолалар асосан субъектив ёндошув билан ёзилишини олдиндан айтиб қўйган яхши. Ўз севимли жамоанг ҳақида ёзганингда 100 % холис бўлиш қийин. Шундай бўлса ҳам, меъёрни сақлашга ҳаракат қиламиз.
“Интер”га бағишланган блог очишга ният қилганимга анча бўлди. Футбол ҳақида ёза олишимга тўлиқ ишончим комил бўлмаганим учун бунга журъат этмаган эдим. Сайт учун “Интер” ҳақида мақола тайёрлаш жараёнида ушбу фикр яна уйғонди ва бугун Олимхўжа Бўронов ёрдами билан ушбу блог пайдо бўлди.
“Интер”га 1998 йилдан бери мухлислик қиламан. Тан оламан, бу клубга “келиб қолишимга” бразилиялик футболчи Роналдо Луис Назарио де Лима сабабчи бўлган. Шундай бўлдики, жароҳатлар гирдобида қолган Роналдо иштирокидаги ўйинларни кўп кўрмадим. Лекин, клубга муҳаббатим ошди. 2002 йилги Жаҳон чемпионатидан кейин Роналдодан умидимиз катта эди. У эса “Реал Мадрид”га “қочиб қолди”. У кетди, мен эса “Интер” билан қолдим. Чунки, мен энди Интерист бўлиб қолгандим. Рони учун эса хурсанд бўлдим.
Шу йиллар мобайнида “Интер” муҳлиси сифатида кўплаб ғалабалар қувончини, аламли, баъзида ноҳақ мағлубиятлар аламини тотдим. 2010 йилги трилетдан маст бўлдим, ўтган йилги 9-ўриндан азобландим.
Бу мавсум “Интер” учун Эрик Тоҳир президентлигидаги янги даврнинг бошланиши бўлиши кутилмоқда. Хавьер Занетти бошчилигидаги “фахрий”ларнинг “Интер”дан кетиши Массимо Моратти даврининг рамзий якуни бўлди.
Хуллас, бошладик. Тез орада шу ерда кўршамиз.
Шермуҳаммад Абдуғофуров (https://twitter.com/sherabdugapirov)
