Хитой Тайпейида енгил атлетика бўйича ўсмирлар ўртасида Осиё чемпионати якунланди. Мусобақаларнинг сўнгги кунида ҳамюртларимиз яна иккита бронза медалига сазовор бўлишди.
200 метрга югуриш финалида Нигина Шарипова маррага учинчи бўлиб етиб келди. Лилия Манасипова шахсий рекордини янгилаган ҳолда марра чизиғини бешинчи бўлиб кесиб ўтди. Ушбу турда олтин медаль ҳиндистонлик Дюти Чандга насиб этди.
Узоққа сакраш секторида Тимур Хусунуллин шахсий рекордини 9 сантиметрга яхшилашга муваффақ бўлди ва бронза медали билан тақдирланди. Чемпионлик унвонини хитойлик Яо Кин Фан қўлга киритди.
Чемпионатда ўзбекистонлик олти спортчи омадини синаб кўрди ва уч нафари шоҳсупага кўтарилишга эришди. Ҳамюртларимиз ҳисобида битта кумуш ва иккита бронза медали бор. Энг муҳими, деярли барча спортчиларимиз шахсий рекордларини яхшилашгани уларнинг истиқболи порлоқ эканидан далолат бериб турибди. Демак, янги ёрқин ғалабалар олдинда.
Омонбой Тўхтамирзаев
