ЖЧ-2014да илк дуранг натижа қайд этилди. Мазкур мундиалнинг сермаҳсул кечаётган бошқа ўйинлари билан солиштирганда, Нигерия-Эрон ўйини бироз эҳтиёткорона кечди, деб айта оламиз. Бу ўйиннинг аҳамияти жуда юқори эди. Боиси, ютқазган жамоа гуруҳда 2-ўрин учун курашдан чиқиб кетарди (Аргентина гуруҳ ғолибига айланса керак).

Нигерия ҳудудий устунликка эга бўлди, аммо Эрон тартибли ҳимояланди. Тўп африкаликлар ҳужумчилари — Аҳмад Муса, Эммануэль Эменике ва Виктор Мозес томон кўп ҳам етиб боравермади. Етиб борган пайтда ҳам улар дарвоза томон хавф сола олишмади. ЦСКА ҳужумчиси Муса танаффусгача 2та имкониятга эга бўлди. Унинг дастлабки зарбасини ҳимоячилар, иккинчисини эса дарвозабон қайтарди.

Карлос Кейруш шогирдлари ҳам ҳисобни очишлари мумкин эди. Бурчакдан етказилган тўпдан сўнг Ризо Қучаннажод бош билан зарба берди, бироқ Винсент Эньеама ўз жамоасини қутқариб қолди.

Иккинчи бўлимда хавфли вазиятлар сони янада камади. Нигерия бош мураббийи майдонга Питер Одемвингиени тушириши ўйинни жонлантирдию, аммо рақиб дарвозаси барибир ишғол қилинмади. Натижада мухлислар гол кўришмади.

ЖЧ-2014. "F" ГУРУҲИ
ЭРОН – НИГЕРИЯ 0:0
Эрон: Ҳақиқий, Мунтазорий, Ҳуссайний, Содиқий, Пўлодий, Некуном, Ҳожисафий, Ҳайдарий (Шожаий 89), Дежага (Жаҳонбахш 78), Теймурян, Қучоннажод.
Нигерия: Эньема, Эмброуз, Ошанива, Обоабона (Йобо, 29), Омеруо, Азиз (Одемвинги, 69), Оби Микел, Онази, Муса, Мозес (Ш. Амеоби, 52), Эменике.
Огоҳлантиришлар: Теймурян (75).