Грециянинг Кавала шаҳрида мактаб ўқувчилари ўртасида ўтказилган рапид – тезкор шахмат бўйича жаҳон чемпионатида ҳамюртларимиз ака-ука Исломбек ва Жавоҳир Синдоровлар ўз ёш гуруҳларида биринчи ўринни эгаллаб, жаҳон чемпионидек шарафли номга сазовор бўлдилар.

Жумладан, етти ёшгача бўлган шахматчилар баҳсида Ватанимиз шарафини ҳимоя қилган Исломбек Синдоров тўққизта партиянинг барчасида ғалаба қозонди. Умидли, ёш шахматчимиз баҳслар давомида россиялик Алексей Фадеев, грециялик Георгиос Хатзигавриил, болгариялик Константин Георгиев ва Светлен Иванов, франциялик Ражат Маккар, озарбойжонлик Али Зуқанов, Фикрат Мустафозода ва Айҳан Жабборли ҳамда британиялик Дҳрув Радҳакришнанни мағлубиятга учратиб, ўз ёшида жаҳонда тенгсиз эканлигини амалда исботлади.

Тўққиз ёшгача бўлган спортчилар мусобақасида ғолиблик учун дона сурган Жавоҳир Синдоров ҳам турнир давомида бирорта мағлубиятга учрамай, Ўзбекистон шахмат мактаби қай даражада тараққий этиб бораётганлигини яна бир бора намоён этди. Иқтидорли спортчимиз грециялик Маркоз Казакос, россиялик Артемии Борисов, Лев Левкин, Михаил Друченко, Георгий Вдовин ва Владимир Анчиков ҳамда озарбойжонлик Самад Аслановни енгиб, яна бир озарбойжонлик шахматчи Мартин Саломов ва ҳиндистонлик Лоҳия Сиддҳант билан дуранг ўйнади.

Шу тариқа, тўққиз имкониятдан 8 очко жамғарган Жавоҳир Синдоров ҳам жаҳон чемпионатининг олтин медалини қўлга киритди.