13 – 17 июнь кунлари Грециянинг Кавала шаҳрида мактаб ўқувчилари ўртасида шахматнинг рапид ва блиц йўналишлари бўйича жаҳон чемпионати бўлиб ўтди. Унда иштирок этган ёш шахматчиларимиз Жавоҳир ва Исломбек Синдоровларнинг ҳар иккиси ҳам ҳар иккала йўналиш бўйича барча рақибларини доғда қолдириб, икки карра жаҳон чемпиони деган шарафли номга сазовор бўлишди.

7 ёшгача ўғил болалар ўртасида рапид мусобақасида баҳсларни 19-рақамли иштирокчи сифатида бошлаган Исломбек 9 партиянинг барчасида ғалаба қозониб, 2-ўринни эгаллаган шахматчини нақ 2,5 очко ортда қолдирди! 9 ёшли болалар мусобақасида иштирок этган акаси Жавоҳир мағлубиятга учрамади: 7 ғалаба, 2 дуранг. Блиц мусобақасида ака-укаларнинг иккаласи ҳам бир хил — 8 очкодан жамғариб олтин медалга сазовор бўлишди. Дурангни ёқтирмайдиган чемпион — Исломбек 8 ўйинда ғалаба қозониб, 1 ўйинда мағлубиятга учраган бўлса, Жавоҳир рапиддаги сингари блиц баҳсларида ҳам 7 ғалаба ва 2 дуранг билан шоҳсупанинг энг юқори поғонасига кўтарилди.

Сергели туманидаги “Спорт. Дўстлик. Ғалаба” шахмат мактаби тарбияланувчилари бўлган ушбу иқтидорли шахматчиларимизни, уларнинг ота-онасини, бобоси Республика шахмат федерацияси раиси ўринбосари Комил Синдоровни, биринчи мураббийлари Сабоҳат ва Сирожиддин Зайниддиновларни бу улкан муваффақият билан қутлаймиз!

Жавоҳир ва Исломбек яқинда бошланадиган Осиё чемпионатида ҳам мамлакатимиз байроғини баланд кўтаришларига тилакдошмиз.

Ҳусан Нишонов