Испания терма жамоаси собиқ ҳужумчиси Рауль Германия ва Аргентина терма жамоалари ўртасидаги ЖЧ-2014 финал учрашуви олдидан немис жамоасининг кучсиз нуқталари деярли йўқ эканини айтиб ўтди. У Йоахим Лев шогирдларининг айнан жамоавий ўйин бобида рақибдан устун эканликларини ҳам таъкидлади.

"Қоидага кўра жаҳон чемпионати финалида фаворитлар бўлмайди. Бразилияда ушбу анъана бузиладиган кўринади. Фаворит – Германия, улар ярим финалда мезбонларни тор-мор этишгач яққол фаворитга айланишди. Улар бу кунни интиқ бўлиб кутишган ва бугун айнан орзуни амалга ошириш учун мос келадиган кун.

Жаҳоннинг уч карра чемпиони бўлган ушбу терма жамоада индивидуал футболчиларга боғлиқлик йўқ. Ярим ҳимоячиларнинг ҳар бири гол уриши мумкин. Немисларнинг ҳимояси ҳам дарвозабон Мануэль Нойер бошлиқ ажойиб тизим. Йоахим Лев эса қачон ва қаерда қандай ўзгариш қилиш кераклигини жуда яхши биладиган мутахассис", - дейди Рауль.