Икки кунлик танаффусдан сўнг жамоамиз машғулотларини пойтахтда давом эттира бошлади.
"Ўзбекистон" меҳмонхонасида истиқомат қилаётган жамоамиз аъзолари, "Тўқимачи" стадионида машғулот олиб бормоқда. Бугунги машғулотларда жамоа таркиби тўлиқ кўриниш олди. Айни вақтда "Олмалиқ" йиғинида иштирок этаётган 24 футболчидан 18 нафари биринчи даврада жамоа шарафини ҳимоя этган бўлса, 6 нафари жамоа кўригида бўлган футболчилардир. Жаҳонгир Жиямуродов, Евгений Гоголь, Элдор Эргашев, Ислом Исҳоқжонов ва Никита Павленколар жамоа сафига қўшилгани ҳақида аввалроқ хабар бериб ўтгандик. Бугунги машғулотда Юрмала шаҳрининг "Спартак" жамоасидан марказий ҳимоячи Виталийс Смирновс ҳам иштирок этди. 2004-2011 йиллар Риганинг "Сконто" жамоаси шарафини ҳимоя этган Виталийс, 2012-2013 йилларда "Вентспилс"да тўп сурди. Бу йилги мавсумни туғилиб ўсган шаҳри жамоасида ўтказаётган ҳимоячи Латвия терма жамоаси сафида 7 ўйинда майдонга тушган. Смирновс бунгача ҳам пойтахтимизда бир муддат бўлган. 2005 йил "Пахтакор" клуби ташкил этган халқаро турнирда "Сконто" жамоаси сафида тўп сурган. У бир марта МДҲ кубогида "Бунёдкор"га қарши майдонга тушганини ҳам айтиш мумкин. Бир неча марта Латвия чемпиони бўлган Виталийс кўрикдан муваффақиятли ўта олса, "Олмалиқ" сафида иккинчи даврада фаолият олиб бориши мумкин.
Жамоамизнинг навбатдаги ўртоқлик назорат ўйини 21 июль куни "Тўқимачи" стадионида Фарғонанинг "Нефтчи" жамоасига қарши ўтказилади. Учрашув 17:45да бошланиши режалаштирилган.
