Непал ўсмирлар (U16) терма жамоаси Жанубий Кореяда 2 ҳафталик йиғин ўтказиб, у ерда 3та ўртоқлик ўйинида майдонга тушди.

Эслатиб ўтамиз, ушбу терма жамоа шу йилнинг сентябрь ойида Таиландда ўтказиладиган Осиё чемпионатининг "С" гуруҳида Ўзбекистон, Кувайт ва КХДР билан баҳс олиб боришади. Гуруҳнинг дастлабки ўйинида (7 сентябрь) непалликлар Ўзбекистонга қарши майдонга чиқишади.

Непал ва Корея ўсмирлар терма жамоалари ўртасидаги ўйинда ҳисоб очилмади. Шунингдек, непалликлар маҳаллий футбол мактабларнинг иккитаси билан ўтказилган назорат ўйинлари битта дуранг (2:2) ва битта ғалабага (1:0) эришишди.

"Бу фантастик йиғин бўлди. Барчаси биз кутганимиздек бўлди. Шогирдларим яхши футбол ўйнашди, уларнинг ҳаракатларидан қониқиш ҳосил қилдим. Улар навбатдаги хориж йиғинларида янада ўсишади, деган умиддаман. Яхши шароит ва яхши ўйинлар футболчиларни руҳан кўтаради. Қатар ва Бельгияда ўтказиладиган йиғинлардан кейин биз Таиланддаги қитъа чемпионатига тайёр бўламиз", - дейди Непал U16 терма жамоаси бош мураббийи Гопал Маҳаржан.

Осиё чемпионатида кучли тўртликка кирган терма жамоалар келаси йили Чилида ўтказиладиган ЖЧда иштирок этиш ҳуқуқини қўлга киритишади.