Александр Мочинов бош мураббийлигидаги Ўзбекистон U-16 ўсмирлар терма жамоаси 15-25 июль кунлари Туркиянинг Истанбул шаҳрида ўтказилган халқаро турнирдаги иштирокини якунлади ва 26 июль куни тонгда Тошкентга қайтиб келди. Таъкидлаш жоиз, Мочинов шогирдлари турнирдаги сўнгги ўйинида маҳаллий «Истанбулспор» клубининг U-17 ўсмирлар жамоасига қарши майдонга тушди. Ўйин Ўзбекистон U-16 ўсмирларининг устунлигида ўтди ва якунда Мочинов шогирдлари рақибини 7:1 ҳисобида мағлубиятга учратишди.

Аввалроқ хабар берганимиздек, Ўзбекистон U-16 ўсмирлар термаси турнирдаги илк ўйинида Саудия Арабистони ўсмирларига қарши ўйнаган ва мағлубиятга учраган эди. Иккинчи ўйинда Қатар U-16 ўсмирларига қарши тўп сурган ўзбекистонлик ўсмирлар 1:1 ҳисобида дуранг ўйнашди. Турнирдаги учинчи ўйинда эса, Ўзбекистон ўсмирлар терма жамоаси иорданиялик ўсмирларга 0:3 ҳисобида мағлуб бўлишган эди.

Эслатиб ўтамиз, Ўзбекистон U-16 ўсмирлар терма жамоаси шу йилнинг 6-20 сентябрь кунлари Таиландда бўлиб ўтадиган U-16 Осиё Чемпионати финал босқичида иштирок этади.