Тошкентда бир ҳафталик йиғинни якунлаган «Динамо» жамоаси куни кеча Самарқандга қайтиб келди. Пойтахтдаги машғулотлардан сўнг Равшан Ҳайдаровнинг жамоа йиғини борасидаги фикрлари билан қизиқдик.

«Ўтказилган йиғинда «Динамо» жамоаси уч ўйинда майдонга тушиб - «Машъал», «Пахтакор» ва «Навбаҳор» жамоаларига қарши тўп сурди. Ҳар уччала ўйинда ҳам кичик ҳисобдаги мағлубиятларга учралган бўлинсада, асосий эътибор тайёргарликка қаратилганди. Имконқадар барча футболчилар синовдан ўтказилди» - дейди Равшан Акмалович.

«Хусусан, «Пахтакор»га қарши ўйинда жамоа тактик жиҳатдан тайёргарлик кўрган бўлса, «Навбаҳор» билан баҳсда жамоа нисбатан жиддийроқ тўп суришга интилиб, қайсидир маънода Олий лига доирасидаги «Насаф» билан баҳсга тайёргарлик олиб борди. Афсуски, динамочиларнинг аксарият етакчи футболчилари ушбу икки ўйинда жамоага ёрдам бера олишмади. Уларнинг майдонда йўқлиги ушбу ўйиндаги натижаларга таъсир этгандир, аммо умумий тайёргарлик босқичига жуда жиддий таъсир ўтказади, деб ўйламайман.

Жамоа чемпионат ўйинига қадар Самарқандда бир ҳафта тайёргарлик кўради. Ушбу йиғиндан ҳам имконқадар унумли фойдаланиш шарт. Яъни, янада яхшироқ тайёргарлик кўриш керак. Зеро, иккинчи давранинг биринчи учрашуви «Динамо» - «Насаф» ўйинида ҳар икки жамоага ҳам осон бўлмайди» - дейди Равшан Ҳайдаров.