Давралар оралиғида Фарғонанинг “Нефтчи” жамоаси бир қатор харидларни амалга оширди. Бугун Қиргулидаги “Нефтчи СК”да янги футболчиларнинг таништирув маросими бўлиб ўтди. Унда ОАВ ходимлари ва футбол мухлислари иштирок этишди. Маросимда клуб раҳбари Тоҳир Кападзе янги футболчиларни расман оммага таништирди.

— Жамоанинг олдига катта мақсадлар қўйилган, — деб гап бошлади Кападзе. – Биз давралар оралиғида таркибни кучайтиришга ва трансферларни тўғри йўлга қўйишга ҳаракат қилдик. Мен ҳамиша битта фикрда бўлиб келганман, биринчи навбатда Фарғона жамоаси нуфузини мана шу ердаги махаллий ўйинчилар кўтариши керак. Албатта легионерлар ҳам зарур. Легионерлар қандай бўлиши керак? Легионер жамоада етакчи бўлиши керак. Ўйинчиларни ортидан эргаштириши лозим. Лекин бугунги кунда бизнинг молиявий имкониятларимиз мана шундай кучли легионерларни олиб келишга етмаяпти. Шунинг учун асосий эътиборни ўзимизда тўп сурган ва келажаги порлоқ ўйинчиларга  қаратиб, маблағларимизни сарфладик. Бугун хурсандчилик билан айтишим мумкин, бизни футбол мухлислари олдида юзимиз ёруғ. Берган ваъдаларимизнинг устидан чиқяпмиз. Мана 6 та трансферни амалга оширган бўлсак, буларни ҳаммамиз яхши таниймиз. Барча футболчиларни  имкониятларини аввал ўрганиб кейин уларни Фарғона таклиф қилдик. Шунинг учун ушбу харидлардан бутун “Нефтчи” жамоаси мамнун бўлмоқда. Яна шуни қўшимча қилиш мумкинки, жамоамизнинг олдига қўйган мақсадларига эришишида ушбу йигитларни ўрни катта бўлади. Трансфер шундай нарсаки, ундан доим кўнглинг тўлмайди. Қани эди, битта яхши дарвозабон, ҳимоячи олсак...

Энди буёғи футболчиларнинг ўзига боғлиқ. Оллоҳ омадимизни берса, биринчи даврага қараганда кейинги даврада яхши натижаларни қайд этиб, янада мухлисларнинг ишончини оқлашга ҳаракат қиламиз. Чунки футбол шундай нарсаки, ғалаба бор жойда доим хурсандчилик бор. Мағлубият бор жойда, доим тушкун кайфият хукмронлик қилади.

Энди футболчиларни таништираман. Акмал Холматов, “Нефтчи”нинг энг гуллаган даврида тўп сурган. Шерзод Ҳакимов ҳам “Нефтчи”нинг нонини еган. Жамоамизнинг кўплаб голларини киритган йигит. Ҳали, Ҳакимовнинг ваъдалари катта. Андрей Акопянц — Ўзбекистон футболига мехнати синган ўйинчи. Сардор Мирзаев — бизнинг охирги трансферимиз бўлди. Бу футболчига ҳам “Нефтчи” клуби бегона эмас. Умидли тоғларимиздан бири, бу йигитга бекорга Умид деб исм беришмаган. Умид Қодиров. Ҳозир қўқонлик футбол мухлислари озгина ғамгин. Чунки Қодиров Қўқон жамоасидаги энг моҳир ижрочилардан бири эди. Сардор Раҳмонов — бизнинг ёш футболчимиз. Икки марта ЖЧ баҳсларида ватанимиз шарафини ҳимоя қилган. Аввалига, Раҳмонов қишки йиғинимизда иштирок этганди. Аммо Вадим Абрамов чақиртириб олди. Охирида шахсан ўзим Абрамовдан илтимос қилиб, Сардорни Фарғона олиб келдим. Чунки ҳимоя зонасида катта муамоларимиз бор эди. Шунинг учун Сардор ёш бўлишига қарамасдан ҳимоямизни мустахкамлайди деб умид қиламан.

Ҳожиакбар Жабборов stadion.uz сайти учун
 Фарғонадан махсус тайёрлади.