Фарғонада кечган “Нефтчи” – “Бухоро” (1:0) учрашувидан сўнг одатдагидек матбуот анжумани ташкил этилди. Унинг биринчи қисмида меҳмонлар устози Эдгар Гесс иштирок этди.
"Ўйин биз учун мураккаб ўтди – дея гап бошлади Эдгар Яковлевич. - Аслида шундай бўлишини ҳам билгандик. Учрашув мухлисларга ҳам ёқди назаримда. Улар бугун жамоасини яхши қўллаб-қувватлаб турди. Давралар оралиғидаги бир ойлик танаффусдан кейин биз бу ўйинга яхши тайёрланган эдик. “Нефтчи”га қарши кечадиган учрашувлар доим кескин курашларга бой бўлишини олдиндан билардик. Шогирдларим бугун яхши ҳаракат қилишди. Лекин омад биздан юз ўгирди.
Рақиб жамоа таркибида Акмал Холматов қолган ўйинчилардан ажралиб турди. Унинг ишончли ўйини менга ёқди.
Ҳакамлар ҳақида мен ҳеч нима дея олмайман. Улар ўз вазифаларини яхши бажаришди. Менинг вазифам шогирдларимни ўйинларга пухта тайёрлашдан иборат".