Жорий йилнинг 25-31 август кунлари Россиянинг Челябинск шаҳрида дзюдо кураши бўйича катталар ўртасида навбатдаги жаҳон чемпионати баҳслари ўтказилади.

Дунёнинг юздан зиёд давлати полвонлари иштирокида ўтказиладиган бу йилги жаҳон чемпионатида эркаклар ва аёллар ўртасида 14 вазн тоифасида беллашувлар бўлиб ўтади. Ҳар бир терма жамоа 18 нафаргача (9 нафар эркак – 9 нафар хотин-қизлар) спортчи билан (ҳар бир вазн тоифасида 2 нафаргача спортчи билан) қатнашиши мумкин. Бундан ташқари жаҳон чемпионатида жамоавий беллашувлар ҳам ўтказилади.

Шахсий ҳисобдаги беллашувлар 25-30 август кунлари ўтказилса, жамоавий баҳслар 31 август куни бўлиб ўтади. Мусобақалар 2014 йилнинг 1 январидан кучга кирган янги қоидалар асосида ўтказилади.

Ўзбекистон дзюдо федерациясидан олинган маълумотларга кўра, мазкур жаҳон чемпионатида Ватанимиз шарафини 11 нафар спортчи (9 нафар эркак – 2 нафар аёл) ҳимоя қилади.

Терма жамоамиз бош мураббийси Андрей Штурбабин асосий таркибга қуйидаги спортчиларни киритган:
Эркаклар терма жамоаси: - Шарофиддин Лутфуллаев, Мирзоҳид Фармонов, Ришод Собиров, Мирали Шарипов, Яҳё Имомов, Дилшод Чориев, Рамзиддин Саидов, Соиб Қурбонов, Элёр Машарипов.

Аёллар терма жамоаси: - Гулноза Матниёзова, Муқаддас Кубеева.

Агарда тайёргарлик жараёнида олинган жароҳат ёки бошқа сабаб билан асосий таркиб спортчиси жаҳон чемпионатига бора олмаса, унинг ўрнига захира таркибидан ўрин олган спортчи боради.

Қуйида захира таркибидан ўрин олган спортчилар рўйхати берилган: - Диёрбек Ўрозбоев, Улуғбек Норқобилов, Сарвар Шомуродов, Шуҳратжон Арслонов, Шахзодбек Собиров, Эркин Дониёров, Абдулло Тангриев, Шерали Жўраев, Болтабой Болтаев ва Шоҳиста Сафарова.

Эслатиб ўтамиз, мазкур жаҳон чемпионатида 2016 йил Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмалари учун рейтинг очколар ўйналади.