9 август, шанба куни "Пахтакор" Тошкентда олий лиганинг 15-турида "Нефтчи"ни қабул қилади.

Олий лига ташкил қилингандан буён унда узлуксиз иштирок этиб келаётган жамоалар тўқнашуви Ўзбекистон футболи тарихидаги энг муросасиз қарама-қаршилик сифатида эътироф этилади. Ушбу жамоалар майдонга тушганда ишқибозлар ҳамиша кескин ўйин гувоҳига айланишади. Футболчилар ҳам учрашувнинг ўта муҳим эканлигини ҳис қилган ҳолда ҳаракат қилишади.

"Нефтчи" Мурод Исмоилов бошчилигида иккинчи давра олдидан таркибга бир қатор футболчиларни жалб қилди. Холматов ва Акопянц сингари тажрибали ўйинчилар, Қодиров, Раҳмонов, Мирзаев ва Ҳакимов сингари иқтидорларни таркибга қўшди.

Чемпионатларда "Пахтакор"дан энг кўп очкони айнан фарғоналиклар олишган. Олий лигада ўтказилган 45 учрашувнинг 21тасида жамоамиз, 17тасида "Нефтчи" ғалаба қозонган. Фақат 7 баҳс дуранг билан якунланган. Тўп киритиш борасида устунлик "шерлар" тарафида - 75:60. Биринчи даврада Фарғонада ўтган ўйинда Козак ва Андреевнинг голларига мезбонлардан Жиямуродов беллашув охирларида жавоб қайтарганди. Тошкентдаги 22 баҳснинг 16тасида "Пахтакор", 4тасида "Нефтчи" зафар қучган. 2 ўйин дуранг билан тугаган. Охирги бор пойтахтда 2001 йил очко олган фарғоналиклар 2004 йил сўнгги бор жамоамизга қарши сафарда гол уришган. Кетма-кет 9 учрашувда "Нефтчи" Тошкентда "Пахтакор" дарвозасини ишғол қила олмади.

Ёшлар жамоалари учрашуви 8 август, жума куни соат 17:00да Қибрайдаги стадионда бошланади. Асосий таркиблар баҳси 9 август, шанба куни "Пахтакор" стадионида соат 19:30да старт олади. Барча ишқибозларни ўзбекча классикони кузатишга таклиф этамиз. Чипталарни жума кунидан бошлаб стадион кассаларидан 3000 сўмдан харид қилишингиз мумкин.

"ПАХТАКОР" - "НЕФТЧИ"
Ҳакамлар: Ильгиз Танташев, Абдураҳмон Қўлдошев, Бобур Қодиров (барчаси Бухоро), Вадим Агишев (Тошкент).
Назоратчи: Рашид Айтеков (Тошкент).