Олий лига 14-турининг навбатдаги баҳсида «Сўғдиёна»-»Олмалиқ» жамоалари ўзаро баҳс олиб боришди ва ўйинда нурсиз дуранг қайд этилди.

Учрашувдан кейин ташкиллаштирилган матбуот анжуманига дастлаб меҳмонлар бош мураббийи Игорь Шквирин таклиф этилди. Бироқ Игорь Анатольевич матбуот анжуманида қатнашишни рад қилди. Биз ундан бунинг сабабини сўраганимизда у қатъий равишда матбуот анжуманида қатнашмаслигини таъкидлади.

«Сўғдиёна» жамоаси бош мураббийи Даврон Файзиевнинг учрашув ҳақидаги фикрлари қўйидагича бўлди:

«Бугун жамоам футболчиларига ҳеч қандай эътирозим йўқ. Улар қўлдан келганча ҳаракат қилишди. Бизда ҳам, рақибда ҳам имкониятлар бўлди. Аммо ҳеч бир томон гол ура олмади. Майдоннинг бугунги ҳолати ўз ўйинимизни кўрсатиш учун имконият бергани йўқ. Биз курашишдан тўхтамаймиз. Кейинги ўйинларда ижобий натижалар учун майдонга тушамиз. Навбатдаги турда биз «Динамо»га қарши ўйнаймиз. Бу баҳсга шогирдларимни жиддий тайёрлайман»