Кеча Жанубий Кореяда футбол ассоциацияси кубогининг чорак финал ўйинлари бўлиб ўтди. Терма жамоамиз сардори Сервер Жепаров тўп сурадиган «Сеонгнам» «Ёнгнам Университети» жамоаси билан куч синашди.

Таъкидлаш лозимки, сеонгнамликларга жуда енгил рақиб дуч келди. Аммо шундай бўлса-да Кей-лигада ҳам қуйи поғонани банд этиб турган «Сеонгнам» қийинчилик билан ғалаба қозонди. Ҳаваскор жамоа билан ўйиндаги голларни Ли Чанг Хун ва Ким Донг Соблар киритишди. Ўйинда 2:1 ҳисоби қайд этилди.

Сервер Жепаров ушбу ўйинни одатдагидек асосий таркибда бошлади. Ўйиндан кейинги матбуот анжуманида сеонгнамликлар бош мураббийи Ли Санг Юн шогирдлари ўйинидан қониқмаганлигини таъкидлади:

"Албатта, ҳаваскор жамоа ва кей-лига жамоаси орасида фарқ катта. Ўйиндан олдин шогирдларимга камида 6та гол киритишни тайинлаган эдим. Аммо бундай бўлиб чиқмади. Бугун ютқазишни хаёлимга ҳам келтирмадим. Фақат нечта гол киритишимизни тахмин қилдим. Аранг ғалаба қозонган бўлсак ҳам натижадан розиман".

Шунингдек, бош мураббий терма жамоамиз сардори ҳақида ҳам фикр билдириб, сўнгги пайтларда унинг ўйинидан унчалик қониқмаётганлигини сездириб қўйди:

"Ўйиндан олдин Сервер Жепаровга ҳимояга ҳам ёрдам берган ҳолда ҳаракатланишни қаттиқ тайинладим. Агар кўрсатмаларимни бажармаса, захирага михлаб қўйишимни айтиб огоҳлантирдим. Шунинг учун бугун анча тер тўкди ва бундан кейинги ўйинларда ҳам шундай фаоллик кўрсатиши шарт".

Ушбу ғалаба сеонгнамликларни ФА кубоги ярим финалига олиб чиқди.

Отабeк Йўлдошeв
Жанубий Корeя, Сeул