Россия чемпионатининг 3-тур ўйинлари бўлиб ўтмоқда. Бугун бўлиб ўтган ўйинларда ўзбекистонлик легионерлар шарафини ҳимоя қилаётган "Локомотив" ва "Краснодар" жамоалари ғалаба нашидасини суришди.

Виталий Денисов ("Локомотив")
"Локомотив" ўз майдонида "Ростов"ни қабул қилди. Учрашувнинг 5-дақиқасида Касаев, 21-дақиқасида эса Самедов мезбонларни 2та тўп билан одинга чиқиб олишларига ўз ҳиссаларини қўшишди. Боз устига, бўлим сўнгида меҳмонларнинг бир футболчиси майдондан четлатилди. Барча масала ҳал бўлгандек кўрингани учун "темирйўлчилар" хотиржамликка берилишди ва бунинг учун жазоланишларига сал қолди. 70-дақиқада "Локо" футболчисига ҳам қизил карточка кўрсатилди ва пенальтидан ҳисоб биттага қисқартирилди. Қолган дақиқаларда мезбонларни ғалабани ушлаб қолишди.

Виталий Денисов асосий таркибда майдонга тушди ва майдонда энг кўп тер тўккан футболчилардан бири бўлди. Москваликларнинг ҳар иккала голига ҳамюртимиз ҳаммуаллифлик қилди. Ҳар сафар қанотдан етказилган тўпни қабул қилиб олган ҳужумчилар, тўпни дарвозага йўллашди. Иккинчи бўлимда Денисов ўзига хос "хет-трик"ка эришиш мумкин эди, аммо унинг узатмасидан кейин Фернандеш қулай вазиятда дарвозани ишғол қила олмади.

Ушбу ғалабадан кейин "Локомотив" 7 очко билан 3-ўринга кўтарилиб олди.

Одил Аҳмедов ("Краснодар")
"Краснодар" футболчилари "Спартак"ни йирик ҳисобда мағлуб этиб, жамоа хўжайини Сергей Галицкийнинг туғилган кунига совға тайёрлашди. Краснодарликлар кетма-кет иккинчи марта "Спартак" устидан 4:0 ҳисобида зафар қучишгани эътиборга молик. Одил Аҳмедов жамоасининг ҳимоявий ва ҳужумкор ўйинларида бевосита иштирок этиб, ғалаба ўз ҳиссасини қўшди.

"Краснодар" иккита дурангдан кейин мавсумдаги дастлабки ғалабасини мана шундай тарзда нишонлади.