Кеча ўсмирлар ўртасидаги иккинчи Олимпия ўйинларининг очилиш ўйинлари бўлиб ўтди. Бугундан эса спортчилар баҳсларга киришишди. Сайтимиз орқали ўзбекистонлик спортчиларнинг иштироклари билан танаштириб борамиз.

Стол тенниси. Регина Ким биринчи баҳсда франциялик Аудрей Зарифга ютқазиб қўйди. Дастлабки сетда ҳамюртимиз 11-9 ҳисобида ғалаба қозонган бўлса, қолган 3та сетда (3-11, 4-11, 8-11) имкониятни бой берди. Якуний ҳисоб - 1-3. Ҳамюртимиз иккинчи ўйинни жанубий кореялик Сери Паркка қарши ўтказади.

Академик эшкак эшиш. Яккалик баҳсларида Юлдуз Кульгавая 1000 метрга ўтказилган саралаш баҳсларида ўз гуруҳида сўнгги 6-ўринни эгаллади. Ҳамюртимиз ярим финалга чиқиш учун яна бир саралаш босқичида иштирок этади.

Шаҳбоз Абдужабборов ҳам худдий шундай масофага ўтказилган саралаш босқичида ўз гуруҳида маррани учинчи бўлиб кесиб ўтди. Гуруҳ ғолиби ярим финалга тўғридан-тўғри йўлланмани қўлга киритган бўлса, қолган спортчилар яна бир саралашда қатнашадилар.

Сузиш. Эркаклар ўртасида 100 метр масофага брасс услубида сузишда иштирок этаётган ўзбекистонлик спортчи Андрей Правдивцев саралаш босқичида иштирок этди ва ўз гуруҳида финишга биринчи бўлиб етиб келди. У 1:03.99 натижа қайд этди. Аммо бу кўрсаткич унинг ярим финалга чиқишига етарли бўлмади.

Дзюдо. 66 кг.гача бўлган вазн тоифасида Суҳроб Турсунов баҳсларга киришди. У дастлаб болгариялик Тарапановни "иппон" билан мағлуб этди. Чорак финалда эса ҳамюртимиз украиналик Богдан Ядовга имкониятни бой бериб қўйди. Шунинг сўнг Турсунов бронза медали учун саралаш баҳси доирасида беларуслик Дмитрий Минков устидан соф ғалабага эришди. Суҳроб арманистонлик Дермишянни ҳам мағлуб этса, бронза медали учун баҳсда қатнашиш ҳуқуқини қўлга киритади.