Хитойнинг Нанкин шаҳрида бошланган иккинчи ўсмирлар ёзги олимпиада ўйинларида бугун спортнинг 17 тури бўйича баҳслар ўтказилиб, 7 та спорт турида дастлабки ғолиб ва совриндорлар номи маълум бўлади.

Аввало шуни таъкидлаш жоизки, ўсмирлар олимпия ўйинлари дастурига Регби-7 ҳамда гольф спорт турлари қўшилди. Бундан ташқари Нанкин ўйинларида 2010 йили Сингапурда бўлиб ўтган биринчи ўсмирлар ёзги олимпиада ўйинларидан фарқли равишда волейбол бўйича мусобақалар ўрнига соҳилда ўйналадиган волейбол мусобақалари киритилди.

Бевосита, Нанкинда бошланган биринчи кунги баҳслар ҳақида тўхталадиган бўлсак, бугун эрта тонгдан триатлон бўйича ўтказилган баҳсларда илк медаллар шодаси ўз эгаларига топширилди.

Қизлар ўртасида ўтказилган мусобақада австралиялик Бриттани Даттон ўтказилган 1,5 километрга сузиш, 40 километрга велопойга ва 10 кмга югуриш баҳсида марра чизиғини 59 дақиқа-ю 56 сонияда босиб ўтиб ўсмирлар олимпиада ўйинларининг олтин медалига сазовор бўлди. Мазкур мусобақада америкалик Стефани Женкс 1:00:33 натижа билан кумуш, 1:00:55 натижа қайд этган франциялик Эмили Мориер эса бронза медали совриндори бўлдилар.