Бугун Жанубий Корея кей-лигасида навбатдаги тур ўйинлари бўлиб ўтди. Унда «Чоннам» ўз уйида «Сувон»ни 3:1 ҳисобида мағлуб этган бўлса, «Сангжу» - «Кёнгнам» ўйинида 1:3 ҳисоби қайд этилди.

Терма жамоамиз сардори Сервер Жепаров тўп сурадиган «Сеонгнам» бу турда ҳам мағлубият аламини тортишга мажбур бўлди. Бу сафар сеонгнамликлар ўз майдонларида чемпионат аутсайдери «Бусан»га 2:4 ҳисобида мағлуб бўлдилар.

Ушбу ўйинда Сервер Жепаров ўзининг энг яхши ўйинларидан бирини ўтказди десак муболаға бўлмас. У бир қатор вазиятларда жамоадошларини аниқ паслари билан таъминлаб турди. ҳатто бир вазиятда хужумчи Ким Донг Собни дарвозабон билан яккама-якка вазиятга чиқариб берди. Аммо «Сеонгнам» ҳужумчисидан омад юз ўгирди. 1:3 ҳисоби қайд этилаётган вазиятда Сервер жарима зарбасини қойилмақом тарзда дарвозага жойлаб қўйди ва жамоада умид пайдо қила олди. Лекин учрашувнинг қолган дақиқаларида “Бусан” яна битта гол киритиб, керакли уч очкони қўлга киритди.

Ушбу мағубиятдан кейин “Сеонгнам” турнир жадвалидаги ўз ўрнини “Бусан”га бўшатиб берди ва 11-ўринга жойлашди. Сўнгги 12-ўриндаги “Кёнгнам” ҳам бугун ғалаба қозонлганлигини инобатга олсак, энди “Сеонгнам” буёғига лигада қолиш учун курашадиган бўлиб турибди.

Отабек Йўлдошев
Жанубий Корея, Сеул