Хитойнинг Нанкин шаҳрида ўсмирлар ўртасида ўтказилаётган ўсмирлар олимпиада ўйинларида бугун спортнинг 15 турида баҳслар ўтказилиб, шундан 7 тасида медаллар ўйналади. Мамлакатимиз спортчилари оғир атлетика ва трамполин бўйича ўтказиладиган баҳсларда ғолиблик учун кураш олиб борадилар.

Жумладан, оғир атлетика бўйича қизлар ўртасида ўтказиладиган мусобақада Комила Абдуллаева (+63 кг) баҳсларга киришса (Тошкент вақти билан соат 11:30 бошланади), ўғил болалар ўртасида Фарҳодбек Собиров (85 кг) Ватанимиз шарафини ҳимоя қилади (Тошкент вақти билан соат 15:00да бошланади).

Трамполин бўйича бўлиб ўтадиган мусобақада Амиран Бабаян шахсий ҳисобда ўтказиладиган баҳсларда ғолиблик учун кураш олиб боради. Спортнинг ушбу тури бўйича саралаш мусобақалари Тошкент вақти билан соат 10:30да бошланади. Агарда ҳамюртимиз саралаш баҳсларидан муваффақиятли ўтса, Тошкент вақти билан соат 11:40да бошланадиган финал мусобақасида медаллар учун кураш олиб боради.

Бугун эрта тонгда стол теннисчимиз Регина Ким қатарлик шериги Абдулраҳмон Ал Наггар баилан микст баҳсларининг саралаш босқичида иштирок этди. Афсуски, ушбу дуэт биринчи учрашувдаёқ америкалик Л.Занг / К Аввари жуфтлигига 2:3, 0:3 ҳисобида имкониятни бой берди.

Эслатиб ўтамиз, беш кунлик мусобақалар якунига кўра спортчиларимиз 2 та олтин, 1 та кумуш ва 2 та бронза медалини қўлга киритишди.