16-турдан ўрин олган «Машъал» ва «Андижон» қарама-қаршилигида мубораклик футболчилар 6:1 ҳисобида ғалаба қозонишди.

Бу ғалаба «газчилар»га мусобақа жадвалида мавқеиларини янада мустаҳкамлаб олиш имкониятини берди. Ёдингизда бўлса, аввалги турда Александр Хомьяков шогирдлари «Бунёдкор»га 5:1 ҳисобида имкониятни бой берганди. Шу боисдан «бургутлар»га қарши ўйинда муборакликларни фақат ғалаба қониқтирарди. «Андижон»га қарши ўйиндан кейин шу куни «Машъал» дарвозасини қўриқлаган тажрибали посбон Ботир Носировни суҳбатга тортдик.

- Биринчи навбатда жамоамиз мухлисларини ғалаба билан табриклайман, - деб гап бошлади Носиров.

– Ўтган турда «Бунёдкор» жамоасига йирик ҳисобда мағлубиятга учраганимиз, шунчаки тасодиф эканлигини исботлаш учун ҳам мазкур ўйинда муваффақият қозонишимиз керак эди. Ўйин ҳақида гапирадиган бўлсам, биз бу ўйинга жуда яхши тайёргарлик кўргандик ва ўйлаган режаларимизни майдонда амалга оширишга ҳаракат қилдик. «Андижон» устидан йирик ҳисобда ғалаба қозонган бўлсак-да, рақиб ёмон ўйин намойиш қилгани йўқ. Футболчиларимизнинг ғалаба қозонишга бўлган катта иштиёқлари эвазига муҳим уч очкони қўлга киритдик деб ўйлайман.

- Мазкур учрашувда рақибга қараганда кучли ўйин намойиш қилдингларми ёки «Андижон» анча бўш ҳаракат қилдими?

- «Андижон» ёмон жамоа эмас. Боя айтиб ўтганимдек, учрашув натижаси бундай тарзда якунланган бўлса-да, рақиб бизга етарлича қаршилик қилди. Давралар оралиғи пайтида клуб таркибини анча ўзгарди. Бу ўзгаришлар натижасида, ўйин услуби ҳам анча бошқача кўринишга келган. Менимча, клуб шу тариқа давом этадиган бўлса, бу таркиби билан олий лигада қолиш вазифасини уддасидан чиқади. Улар ҳисобда ҳам олдинда бораётганди, бироқ футболчиларнинг сусткашликка берилганлигими ёки бошқа ҳолат таъсир кўрсатдими, кейинчалик ўйин ташаббусини бизга бериб қўйди. Бунинг натижасида улар йирик ҳисобда мағлубият аламини тортиб кўрди. Такрор айтаман, натижа қараб хулоса қилманглар. «Машъал» осонликча ғалаба қозонгани йўқ.

- Тезкор гол қўйиб юборган бўлсангизларда, тезда ўзларингни тиклаб олишга эришдингизлар. Бунга қандай эришдингизлар?

- Дарҳақиқат, тезкор гол қўйиб юбордик. Лекин бош мураббийимизнинг доим айтадиган гапларини эслатсам ёмон бўлмасди. Футбол охиригача, ҳакамнинг ўйин тугаганлиги ҳақидаги хуштаки янграганча давом этади. Сизлар мағлубиятга учраётганларингга қарамай, фақат охиригача ҳаракат қилишларинг керак деб таъкидлаган. Айнан шунга эътибор қаратган ҳолда тўп суришга одатланганмиз. «Андижон» билан ўйинда ҳам тезкор голдан тушкунллика тушмасдан, янада ўзимизда қўшимча куч тўплаган ҳолда тўп сурдик.

- Беллашувдан кейин жамоангиз бош мураббийи Александр Хомяков нималар деди?

- Биласизми, ўйиндан олдинроқ футболчиларга бугун яхшилаб ўйин намойиш қилишларинг, ўтган турдаги мағлубият шунчаки тасодифан рўй берганлигини айнан мазкур учрашувда исботлаб қўйишларинг керак деб алоҳида уқтирганди. Беллашувдан сўнг футболчиларни йирик ғалаба билан табриклади. Бироқ бугун бехато ўйин кўрсатдик дея олмайман. Шулар тўғрисида ҳам гапирди ва кейинги учрашувга янада яхшироқ тайёргарлик намойиш қилишимиз кераклигини айтиб ўтди.

- Мазкур учрашувдаги йирик ғалабадан сўнг футболчиларнинг кайфиятлари янада кўтарилгани табиий. Бу «Пахтакор» билан бўладиган учрашувда сизларга асқотиб қолишига ишонасизми?

- Албатта, ишонаман. Футболда руҳий тарафдан кўтарилиш кўп нарсани ҳал қилади. «Пахтакор»га қарши навбатдаги ўйинда бизга анча қийин бўлиши мумкин. Қолаверса, сафарда тўп суришимизга тўғри келади. Шунга қарамай, «Машъал» ҳар бир учрашувда ғалаба қозониш учун тўп суради. Шуни унутмаслигимиз лозим. Асосий вазифамиз клубнинг бундан беш ёки олти йил илгари мавқеини яна тиклашга қаратилган. Биласиз, ҳар бир жамоада яхши ва ёмонлар кунлар бўлиб туради. 2012 йилда омадсизликлар жамоани таъқиб қилганлиги боис, биринчи лигага тушиб кетгандик. Орадан бир йил ўтиб яна ортга қайтдик. Эндиликда ўша эски мавқеимизни тиклашга астойдил бел боғлаганмиз.

- Жамоанинг жорий мавсумдаги чемпионатимиздаги муваффақиятли одимларида бош мураббийнинг ўрни қай даражада дея оласиз?

- Бош мураббийга кўп нарса боғлиқ дея оламан. Александр Хомяков шундайки, нафақат яхши мураббий, шу билан биргаликда инсонийлик жиҳатидан ҳам бошқалардан яққол ажралиб туради. У жамоамизни бирлаштиришни уддасидан чиқди. Таркибимиз ёш бўлишига қарамай, жамоани жисплаштириш орқали, ютуқларни қўлга киритишда давом этмоқдамиз. Шу боисдан бош мураббийимизнинг жамоада кўрсатаётган фаолиятини ижобий тарзда кетмоқда дейишим мумкин.

- Сиз «Навбаҳор» сафида танилгансиз. Шу боисдан ушбу клубнинг футболчилик фаолиятингиздаги тутган ўрнини қандай баҳолаган бўлардингиз?

- «Машъал» клубида тўп тепишни ўрганган бўлсам, наманганликлар сафида биринчи маротаба олий лигада ўйнашга муваффақ бўлганман. Айнан шу клубда проффесионал футбол қандай бўлишини гувоҳига айланганман. Умуман олганда, фаолиятимнинг энг яхши дамларини «Навбаҳор»да ўтказганман. Шу боисдан бу клубга бефарқ эмасман. «Машъал»даги ўйинларим тугаганидан кейин, дарҳол интернетга кириб, наманганликларнинг қандай ўйин кўрсатганликларига қизиқаман. Чунки жамоа менинг қалбимдан ўрин олган. Унинг мухлисларига тан бериб келганман. Бу йил жамоа ёмон ўйин кўрсатмаяпти. Бахтиёр Ашурматов келганидан сўнг клуб анча ўзгарди. Олдинги мавқеига чиқишини ҳоҳлайман. Ҳозирда қадрдон жамоам «Машъал»даман. Бу ерда ўзимни жуда бахтли ҳис қилмоқдаман. Шуни айтиш керакки, «Машъал» ва «Навбаҳор» мен учун идеал жамоалар ҳисобланади.

- Ҳозирда жамоада Санжар Қувватов ва сиз асосий дарвозабонлар ҳисобланасиз. У билан рақобатлашиш қандай бўлмоқда?

- Қувватов билан 2006 йилдан буён танишман. Шу боисдан у менинг укамдек бўлиб қолган. Бош мураббий ҳар бир турда иккимизга ҳам бирдек ишонч билдириб келмоқда. Ўртамизда рақобат бўлса-да, ҳаётда жуда яқин дўстмиз дея оламан. Қувватов ва Элдор Суюновлар билан аввалдан яхши муносабатда бўлиб келганман. Иккиси ҳам мен учун яхши инсонлар ҳисобланади. Суюнов «Насаф»да бўлса-да, у билан ҳам дўстмиз.