21-25 август кунлари пойтахтимизда спорт устаси Баҳодир Иброхимовнинг хотирасига бағишланган биринчи мусобақа бўлиб ўтди.

Турнирда 2002 йилда таваллуд топган жами 12та жамоа иштирок этди. Булар: “Пахтакор” (Тошкент), СДЮШОР-7 (Чимкент, Қозоғистон), “Самарқанд” (Самарқанд), “Бунёдкор” (Тошкент), “Навоий” (Навоий), “Чилонзор” (Тошкент), “Бухоро” (Бухоро), “Металлург” (Бекобод), “Сурхон” (Термиз), БЎСМ-16 (Тошкент), “Андижон” (Андижон) ва “Сўғдиёна” (Жиззах).

Мусобақа ўйинлари “Чилонзор” ва ЎФФнинг суъний қопламали майдонларида ўтказилди. Ҳал қилувчи финал баҳсида Тошкентнинг икки гранд клуби тарбияланувчилари – “Бунёдкор” ва “Пахтакор” етиб келишди. Учрашувнинг асосий вақтида 2:2 ҳисобидаги жангавор дуранг қайд этилди. Шундан сўнг ғолиб пенальтилар сериясида аниқланди. 11 метрлик нуқтадан зарба беришда ёш “қалдирғочлар” омадлироқ чиқишиб, якунда 4:3 ҳисобида зафар қучишди ва илк бор Баҳодир Иброхимов хотирасига бағишлаб ташкил этилган мусобақа бош совринига эга бўлишди.

3-ўрин учун кечган баҳсда Бекободнинг “Металлург” жамоаси “Андижон”ни 3:0 ҳисобида енгиб, бронза медалларини қўлга киритди.

"Бунёдкор-2002" аъзоси Отабек Жўрақўзиев ташкилокчилар томонидан мусобақанинг энг яхши ҳужумчиси деб топилди.

"Бунёдкор-2002" яқинда Жанубий Кореяда ОФК томонидан ташкил этилган футбол фестевалида ҳам ғолиб чиққанди. Қаторасига иккита мусобақада зафар қучган "Бунёдкор-2002" мураббийлари - Акмал Рисқуллаев ва Сергей Чигодаевни ва футболчиларни самимий муборакбод этамиз!