2015 йилнинг январь ойида Ҳамдўстлик кубоги мусобақаси ўтказилмаслиги мумкин. Бу ҳақда Россия фубол иттифоқи бош котиби Анатолий Воробьев хабар берди.

"Ҳозирча Гранаткин кубоги мусобақасининг тақдири аниқ. Ҳамдўстлик кубоги масаласини ўрганяпмиз. Балки у январда ўтказилмаслиги мумкин.

Биз мусобақани ўтказишнинг янги муддати ва формати устида ишлаяпмиз. Федерациялар ўртасида экспресс-сўров ўтказганимизда мусобақа кўпчиликка керак эканлигини тушундик. Лекин, балки мусобақага ШҲТ (Россия, Ўзбекистон, Қозоғистон, Қирғизистон, Тожикистон, Хитой) ва БРИКС (Бразилия, Россия, Ҳиндистон, Хитой, ЖАР) мамлакатларини таклиф қилармиз. Шунингдек, мусобақанинг ўтказилиш муддатини ҳам ўзгартиришимиз мумкин. Ҳозирги муддати ноқулай, боиси, у Гранаткин кубоги билан кетма-кет бўлиб қолган. Ҳамдўстлик кубоги ребрендингга муҳтож. Умид қиламан, биз қизиқарлироқ мусобақа ташкил қиламиз", - дейди Воробьев.

Эслатиб ўтамиз, Ҳамдўстлик кубогининг амалдаги ғолиби Украина ёшлари ҳисобланади. Улар мазкур йилнинг январь ойида ўтказилган турнир финалида Россияни 4:0 ҳисобида мағлуб этишган. Ўзбекистон ёшлар терма жамоаси эса 22 ёшгача бўлган ёшлар ўртасида Осиё чемпионатида иштирок этгани боис, бу сафар Ҳамдўстлик кубогига бормаган эди.