ФИФА дунё терма жамоаларининг янги рейтингини эълон қилди. Ўзбекистон терма жамоаси август ойи рейтинги билан таққослаганда ўз очколарини 2 баллга оширган бўлса-да, жадвалда 7 поғона пастга тушди. Жамоамиз 58-ўринни банд этди.

Хабарингиз бор, терма жамоамиз 3та ўртоқлик ўйини ўтказди ҳамда битта дуранг (Озарбойжон) ва 2та ғалабага (Иордания, Янги Зеландия) эришди.

Ўзбекистон жадвалда пастлаганига қарамай, Осиёнинг учинчи жамоаси бўлиб турибди. Эрон эса қитъамизнинг энг яхши терма жамоасига айланди. Форслар 4 поғона кўтарилиб, 44-ўринга чиқиб олишди. Тўрт поғона пастга тушган Япония эса 48-ўрин билан Осиёнинг иккинчи жамоаси бўлиб турибди. Иордания терма жамоасининг 13 ўрин пастга "шўнғиши" оқибатида Жанубия Корея 63-ўрини билан қитъада тўртинчи жамоага айланди.

Осиё кубоги-2015да рақибларимизга тўхталадиган бўлсак: Хитой 97-ўриндан қўзғалмади, Саудия Арабистони 82-поғонага кўтарилди (+1), КХДР 150-қаторни эгаллаб турибди (-4).

Жадвалнинг юқори қисмида ҳам ўзгаришлар содир бўлди. Германия ва Аргентина 1 ва 2-ўринларни эгаллаб туришган бўлса, Колумбия Голландияни қувиб ўтиб, 3-ўринга чиқиб олди. Бразилия (6-ўрин) ва Франция (9-ўрин) бир поғонадан кўтарилишган бўлса, Уругвай (7), Испания (8) ва Швейцария (10) терма жамоалари бир поғонадан пастлашган.

Рейтингнинг тўлиқ кўриниши билан ФИФА сайтида танишиб олишингиз мумкин.