Инчеондаги Осиё ўйинларининг бугунги мусобақаларида терма жамоамиз таэквондо спорт турида медалларни қўлга киритганидан хабарингиз бор. Тағин таэквондо спорт турининг Ватани ҳисобланган корейс спортчиларини мағлуб этган ҳолда медалларга эга чиқиш ушбу юрт спорт жамоатчилигини ҳайратга солди.

Жанубий Кореяда нуфузли бўлган "Choson Ilbo" газетасининг интернет саҳифаси ўзбекистонлик таэквондочилар муваффақиятини "Таэквондо Ватанини тиз чўктирган спортчиларни бизнинг қондошимиз машқ қилдирган», - дея фахр билан тилга олади. Жумладан, "Choson Ilbo" шундай ёзади:

"Бугунги таэквондо мусобақаларидан катта умидлар билан олтин медалларни умид қилган эдик. Афсуски, 1 та кумуш ва 2 та бронза медали билан кифояландик, холос. Эркаклар ўртасида 87кг вазнлилар баҳсида Шин Ёнг Ре ва 74 кг вазнли Сонг Йонг Гонлар ярим финалда ўзбекистонлик таэквондочиларга мағлуб бўлишди. Корейс таэквондоси бу кун нақ шарманда бўлаёзди. Ярим финалда бизнинг таэквондочиларимизни тиз чўктирган ўзбек таэквондочиларига асл миллати корейс бўлган Ким Александр мураббийлик қилмоқда. У 49 ёшда бўлиб, аждодлари 1930 йилларда Владивосток томонларда умргузаронлик қилган ва кўчириш сиёсатига кўра, Ўзбекистонга бориб қолишган. Ўзбекистонлик корейс мураббий бизга қуйидагиларни гапириб берди: "Рус тили муаллими бўлган бобом менга доимо: "Сенинг миллатинг корейс. Удумларимизни унутишга ҳаққинг йўқ", дея уқтирарди. Бугун менинг шогирдларим корейс диёрида олтин ва кумуш медалларни олганлигини кўриб бобомнинг руҳлари ҳам шод бўлган бўлса - ниятимга етган ҳисоблайман. Бобомнинг тарихий Ватанида шогидрларим медаль олганлигидан фахрланаман".

Ким Александр мактабга илк қадам қўйган чоғларидаёқ ўзи тенги синфдошларига кучли бўлишни исташини айтар ва шу истак билан таэквондо ўрганишни бошлаган эди. "Таэквондо либосини ҳар сафар кийганимда менинг томиримда корейс қони оқаётганлигини ҳис қилиб турардим ва ўзимга ишонч пайдо бўларди", - дейди Александр. У 1995 йили Филиппинда бўлиб ўтган Таэквондо бўйича Жаҳон биринчилигида Ўзбекистон терма жамоаси сафида иштирок этиб, чорак финалгача етиб кела олди. 2001 йилдан буён эса Ўзбекистон терма жамоасида мураббий сифатида ишлаб келмоқда. Халқаро мусобақаларда корейс таэквондо усталарига муносиб рақиблик қиладиган терма жамоанинг пайдо бўлганлиги эса алоҳида эътирофга сазовор".

Отабeк Йўлдошeв
Жанубий Корeя, Сeул