Ўзбекистонлик енгил атлетикачи Светлана Радзивил делегациямиз ҳисобига тўққизинчи олтин медални келтирди.

Баландликка сакраш мусобақасида Света барчадан баланд сакраб, икки карра Осиё Ўйинлари ғолибига айланди.

Ҳамюртимиз ўз сакрашини 180 см баландликдан бошлади. У 185 см.ни бир уринишда ошиб ўтган бўлса, 189, 192 см.ни иккинчи уринишда забт этди. Хитойлик Женг Синг Жуан ҳам иккинчи уринишда 192 см. баландликдан ошиб ўтди, бироқ у 189 см. баландликдан илк уринишда сакраб ўтиб, ватандошимизга нисбатан кичик устунликка эга бўлиб турганди. Яна бир ўзбекистонлик атлет Надя Дусанова 189 см. натижа билан учинчи ўринни эгаллади. Якунда эса фақат Радзивил ва Женг қолишди.

Баландлик 194 см.га кўтарилди. Дастлабки иккита уринишдан ҳар иккала спортчи фойдалана олишмади. Женг учинчи уринишда ҳам ундан ошиб ўта олмади. Светлана эса учинчи уринишдан 194 см.дан сакраб ўтди ва чемпионликни қўлга киритди.

Радзивил ўз рекордини ўрнатиш мақсадида 2 метрга буюртма берди, аммо учта уринишда мазкур баландликдан сакраб ўта олмади.

Шу тариқа, Радзивил делегациямизга олтин, Дусанова эса бронза медалини тақдим этди. Надя Гуангжоу-2010да кумуш медални қўлга киритганини эслатиб ўтамиз.