"Барселона" клуби бразилиялик ҳужумчи Неймарнинг трансфери учун умумий ҳисобда 104,9 миллион евро тўлаши мумкин.
Неймар 2013 йил "Сантос"дан "Барселона"га ўтган ва бу трансфернинг молиявий томонлари ошкор этилмаган эди.
Январь ойида Неймарнинг отаси келишувнинг баъзи томонлари ошкор қилган эди. Унга кўра, трансфернинг ўз суммаси 57,1 миллион евро бўлган, ундан 17,1 миллиони "Сантос"га тўланган, қолган 40 миллиони Неймарнинг ота-онасига тегишли фирма ҳисобига ўтказилган. Бундан ташқари футболчининг ўзига 10 миллион евро мукофот пули ва бошқа компенсациялар тўланган. Келишувга умумий ҳисобда 86,1 миллион евро сарфланган.
Жума куни Испания ОАВ янги маълумотлар тарқатди. Унга кўра, "Барселона" "Сантос" учун 7,9 миллион евро эвазига учта футболчи сотиб олиб берган. Агар Неймар "Олтин тўп" учун давогарлар учлигига кирса - футболчининг трансфер суммасига яна 2 миллион евро қўшилади. "Барселона" яна 8,8 миллион еврони солиқ сифатида тўлайди.