Ўзбекистон делегацияси Осиё Ўйинларида сўнгги медални қўлга киритди. Каратэ баҳсларида иштирок этган Шаҳбоз Ахатов бронза медалига сазвор бўлди.

Эркаклар ўртасида 84 кг. вазн тоифасида қатнашган Ахатов ўз иштирокини чорак финалдан бошлади. У кувайтлик Ҳамадга қарши татамига чиқди ва 3-4 ҳисобида имкониятни бой берди. Шундан сўнг ҳамюртимиз бронза медали учун ўтиш баҳсида иштирок этди.

Бу йўлда Шаҳбоз дастлаб суриялик Али Рафат аш-Шайх билан баҳслашди. Ўйинда 7-7 ҳисоби қайд этилди, ғалаба Ахатовга берилди. Бронза медали учун баҳсда эса у индонезиялик Салим Хендрони 10-3 ҳисобида мағлуб этди.

Аёллар ўртасида 50 кг.гача бўлган вазнда Дилноза Бакирова 1/8 финалда гонконглик Цанг Йи Тингга қарши татамига чиқди. Жанг 1-1 ҳисоби билан тугади, аммо ғалаба рақиб спортчисига берилди.

Шу тариқа, Ўзбекистон делегацияси ҳисобидаги жами медаллар сони 44тага етди. 9та олтин, 14та кумуш ва 21та бронза медали билан умумжамоа ҳисобида 11-ўринда қолдик.