U-19 ёшлар ўртасидаги Осиё Чемпионатига тайёргарлик кўраётган Ўзбекистон ёшлар терма жамоаси бугун Янгон шаҳрида ўзининг навбатдаги машғулотларини ўтказди.

Куннинг биринчи ярмида тренажер залида машғулот ўтгазган терма жамоа аъзолари куннинг иккинчи ярмида «Yangon United» клубига қарашли стадионда машғулот олиб борди. Терма жамоа аъзолари машғулот давомида иккига бўлинган ҳолда ўзаро тўп суришди. «YUFC» стадионида ўтказилган машғулотлар якунига етгач, терма жамоа делегацияси жойлашган меҳмонхонада назарий машғулотлар бўлиб ўтади.

Маълумот ўрнида, Ўзбекистон U-19 терма жамоаси «В» гуруҳидаги рақиблари - Индонезия, Австралия ва БАА терма жамоалари сингари Янгон шаҳридаги «Taw Bin Garden» меҳмонхонасида истиқомат қилишмоқда.

Эслатиб ўтамиз, Равшан Ҳайдаров бош мураббийлигидаги Ўзбекистон U-19 ёшлар терма жамоаси мусобақадаги илк ўйинини 10 октябрь куни Индонезия ёшлар терма жамоасига қарши ўтказади.

Мусобақанинг гуруҳ босқичи ва плей-офф ўйинлари тақвими ҳақида аввалроқ маълумот берган эдик.