Бугун ёшлар ўртасидаги Осиё чемпионатининг гуруҳ босқичи 2-тур ўйинларига старт берилди. "А" гуруҳида иштирок этаётган Эрон ёшлар терма жамоаси кутилмаганда кетма-кет иккинчи ўйинда ҳам мағлубиятга учради.

Қитъада унчалик кучли ҳисобланмаган Яман терма жамоаси форсларни 1:0 ҳисобида мағлуб этишди. Ўйиннинг бошида (6-дақиқа) киритилган гол яманликларга ғалаба келтирди. Яман 1-турда мезбон Мьянма билан голсиз дурангга имзо чекканди.

Эрон эса бугунги мағлубиятдан кейин гуруҳдан чиқа олмаслиги 100 фоиз аниқ бўлди. Табиийки, форслар ЖЧга бора олишмайди. Ушбу гуруҳда Яман 4 очко билан 1-ўринга кўтарилиб олган бўлса, 3 очко тўплаб турган Таиланд бугун Мьянма билан баҳс олиб боради.

Хабарингиз бор, Ўзбекистон терма жамоаси "В" гуруҳида иштирок этмоқда. Ушбу гуруҳ жамоалари чорак финалда "А" гуруҳ жамоалари билан тўқнаш келишади. Демак, Равшан Ҳайдаров шогирдлари гуруҳда 1 ёки 2-ўринни эгалласалар, чорак финалда Таиланд, Яман ва Мьянмадан бирига тўқнаш келадилар.

Бугун "С" гуруҳида 2-турнинг битта ўйини бўлиб ўтади. Япония терма жамоаси қийинчилик билан Вьетнамни мағлуб этди. Японлар 59-дақиқада ҳисобни очишган бўлса, 90-дақиқада ўз дарвозаларидан гол ўтказиб юборишди. Ўйинга қўшиб берилган дақиқаларнинг 5 ва 7-дақиқаларида кунчиқар юрт вакиллари 2та гол уриб, ғалабани ўз томонларига оғдиришди. Япония 1-турда Хитойга ютқазганди. Жанубий Корея эса Вьетнамни мағлуб этганди.