Бугун эълон қилинган ФИФАнинг янги рейтинг жадвалида Ўзбекистон терма жамоаси 7 ўрин пастлади. Энди термамиз 498 очко билан 65-ўринни эгаллаб турибди.
Шунга қарамай, Ўзбекистон Осиёнинг учинчи жамоаси номини ўзида сақлаб турибди. Кучли элликталикда Осиёнинг бирорта ҳам жамоаси қолмади. Эрон 51 (-7), Япония 52-ўринларга (-4) ўз позицияларини сусайтиришди. Биздан 2 очко камроқ очко жамғарган Жанубий Корея 66-ўринни банд этган.
Осиё кубогидаги рақибларимиз — Саудия Арабистони 15 поғона пайтлади ва 98-ўринга тушиб кетди; Хитой эса 9 ўрин кўтарилиб, 88-ўринга жойлашди; КХДР 148-қаторни эгаллаган.
ОФК коэффициентлар жадвалида Ўзбекистон билан рақобатчилик қилаётган БАА ўз очколарини 17тага камайтирган бўлса (79-ўрин), Қатарнинг очколари 27тага кўпайган (88-ўрин).
Жадвалнинг юқори қисмидаги терма жамоаларнинг очколарида камайиш юз берган. Кучли учликда ҳеч қандай ўзгариш юз бермаган: Германия, Аргентина, Колумбия. Бельгия эса битта ўрин юқорига кўтарилиб, Голландиядан олдинга ўтиб олди.
Жадвалнинг тўлиқ кўриниши билан ФИФА расмий сайтида танишиб олишингиз мумкин.
