ОК-2015 гуруҳ босқичидаги рақиб - Саудия Арабистони терма жамоаси Форз Кўрфази Кубоги баҳслари 2-турида Баҳрайн терма жамоасини йирик - 3:0 ҳисобида мағлубиятга учратди. Айнан Саудия Арабистони мезбонлигида ўтказилаётган турнирнинг гуруҳ босқичи 3-турида саудияликлар Яманга қарши майдонга тушадилар. Ушбу учрашув 19 ноябрь куни бўлиб ўтади. Эслатиб ўтамиз, Хуан Рамон Лопес бош мураббийлигидаги Саудия Арабистони терма жамоаси 1-тур ўйинида Қатар билан 0:0 ҳисобида дуранг ўйнаган эди.
Осиё Кубоги гуруҳ босқичидаги яна бир рақиб - КХДР терма жамоаси ҳам Хитой Тайпейида давом этаётган Шарқий Осиё Кубоги саралаш баҳсларида иккинчи ғалабасига эришди. Саралашнинг 1-турида Гонконг терма жамоасини 2:1 ҳисобида мағлубиятга учратган шимолий кореяликлар, 2-тур ўйинида 16 ноябрь куни Гуам терма жамоасини йирик - 5:1 ҳисобида мағлуб этишди. КХДР терма жамоаси 3-турда 19 ноябрь куни Хитой Тайпейи терма жамоасига қарши майдонга тушади.
Эслатиб ўтамиз, Ўзбекистон миллий терма жамоаси декабрь ойида БААнинг Дубай шаҳрида ОК-2015 финал босқичидан олдинги сўнгги ўқув-машғулот йиғинини ўтказади.
